Ka sorkar Meghalaya Democratic Alliance (MDA) ka la neh san snem kynthih naduh ba la thaw ïa ka ha u 2018 hapoh ka jingïa-lam u Myntri Rangbah u Conrad K Sangma, na ka parti NPP. Ha kane ka sorkar, ki don lang ka UDP, PDF, HSPDP, BJP, NCP, KHNAM bad ki MLA shimet. Ka Congress ka shong ha ka liang-pyrshah hynrei hadien ka la twa noh hadien ba ki 12 ngut ki MLA kila mih ban leit ïasoh sha ka TMC bad mynta baroh ki 5 ngut ki MLA ka Congress kiba la shah sospon kila khreh mih lut na ka parti hadien ba kila shah pyn-shitom ha ka parti namar ba ki leit ïasoh lang ha ka sorkar MDA.
Ka Congress ka dei kaba sinew bok ha kane ka snem kaba mynta namar ba ka hap ban duh lut khait ïa ki MLA na ka 21 ngut sha ka jiro katba ka TMC ka dei kaba bha bok tam namar ba na ka jiro ka ïoh 12 ngut ki MLA ha kane ka jylla.
Ka sorkar MDA ka dei kaba lai ha ka jylla Meghalaya kaba neh baroh san snem, kaba nyng-kong ka dei ka sorkar Congress kaba ïalam u Salseng C Marak ha u snem 1993-1998, kaba ar ka sorkar ka dei ka sorkar u MUA kaba ïalam u Dr. Mukul Sangma bad kaba lai ka MDA. Baroh kine ki sorkar kiba neh beit triang haduh san snem, ki dei ba ialam Myntri Rangbah na ka jaitbynriew Garo, katba kiwei ki sorkar ba ialam ki Khasi, kim ju neh baroh san snem bad ka khyllem noh tang shipor. Ka jaitbynriew Garo ka pynmih Myntri Rangbah san ngut kyn-thup u (L) Capt. Williamsong A Sangma, (L) u Purno A Sangma, u Salseng C Marak, Dr. Mukul Sangma bad u Conrad K Sang-ma, katba ka jaibynriew Khasi ka pynmih Myntri Rangbah hynriew ngut hi, kynthup u (L) DD Pugh Diengdoh, (L) BB Lyngdoh, DD Lapang, (L) EK Mawlong, (L) Dr. Donkupar Roy bad u (L) Dr. FA Khonglam. Napdeng kine ki Myntri Rangbah Khasi, ym ju don uwei ruh uba lah ban neh ka sorkar haduh san snem hynrei ki khyllem noh shipor. U Salseng u la pynneh ïaka sorkar san snem kum u Myntri Rangbah ha ka por ka Congress, bad kumjuh u Dr. Mukul Sangma katba u Conrad u la pynneh san snem jong ka NPP, bad baroh ki dei ki sorkar ba ïalam ki seng national parties katba ki sorkar ki seng riewlum kim lah ban neh haduh san snem.
Ka la don ka jingkynnoh na ki paidbah ba ka jinghiar ka jingjop MLA ki seng riewlum ka dei namar ba ki iamih bun palat kumba mih ki tit lyiur haduh ba u paidbah u king baiong ban jied ïano bad kane ka la pyn-pharia ia ka vote jongki. Kane ka dei kawei ka daw kaba lah ban long kumta hynrei ha ka synshar paidbah, ym lah ban khang ïano ïano lada kwah ban seng parti thymmai wat u riew shimet ruh bun kiba jop elek-shon, khamtam ha kane ka jylla ha kaba ki briew kim ju peit parti than hynrei ki peit ïa ka jingleh bha jong u briew.
