Ha kine ki sngi, ka jingïabeh ïa ka thoh ka pule, kaba ngi ong ka Education ka long kaba ishyrkhei haduh katta katta. Kane ka long namarba ka la don ka jingsngewthuh ba khlem ma ka pleng, kata khlem ka thoh ka pule kaba biang, yn ym lah ban kiew shaphrang ha kane ka juk kaba mynta. Kane ka lah ban long ba imat ba baroh baroh ki la ïa sngewthuh, ba ka thoh ka pule ka dei u shabi jong ka lawei baphyrnai jong ka jingim jong ngi. Dei kane ka jingsngewthuh kaba pynlong ïa ki khynnah skul, ki samla pule College bad University ban khreh kot dohïap ban pass bha ïa ki jingpule jong ki.
Ki samla pule kiba la sngewthuh ïa kane, ki la nang jam shaphrang. Hynrei, aiu kein ngin leh na ka bynta kito ki samla pule kiba ym pat sngewthuh ïa kane? Kawei kaba ngi lah ban leh, ka long ban pynsngewthuh ïa ki bad ban pynshlur lem ruh ïa ki ba ka thoh ka pule, ka dei ka ïap bad ka im ka jong ki hi. Dei ban mai ïa ki khun ba kim khreh kot ne ba ki leh sting ïa ki jingpule. Hynrei, ym dei pat ban tim ïa ki da ki kyntien dumok, “Ki khun ksiew aïu kiba kum kine kiba jaituh khreh kot”. “Kum pha, kum me, ka bha ba pha ïa beij bad sah klass”. Kine ki kyntien pynduh mynsiem kim dei da lei lei ruh ban mih na ka shyntur ki kmie ki kpa jong ngi. Lada ngi kren kum ïa kine ki jait kyntien, ngi pynngeit ïa ki khun jong ngi ba ki long ki khun kiba biej. Kane ka pynlong ia ki ban ngeit ba ïa ki la kha ban long kiba jaituh.
Dei ban pynshlur ia ki ban smat ïa ki jingpule ba kin long heh long haiñ ha ka jingim ka jong ki. Kine ki kyntien kin pynlong ïa kine ki khun jong ngi ban sngew ba ki dei shisha kita ki khun kiba stad bad kiba proh jabieng. Kine ki kyntien kin ai mynsiem ïa ki ban khreh kot bun kynta ha ka shi sngi. Dei ruh ban pynsngew ha ki, ba kim dei ban khreh da kaba pynbor hynrei da ka mon sngewbha ba ki sngewthuh ba ki dei ban ïoh ïa ka jingjop.
