SHILLONG:
U myntri rangbah ka sorkar jylla u Conrad K Sangma, ha ka 1 tarik Nohprah, u la plie ïa ka ophis jong ka Prime Hub jong ka All Garo Hills Multipurpose Cooperative Society (AGHMCS) Limited, ha ka shnong Babadam kaba hap hapoh ka Rongram Community bad Rural Development Block ha ryngkat ka jingïadonlang u nongai jingmut ïa u myntri rangbah, u Thomas A Sangma, u Secretary jong ka AGHMCS bad u Director jong ka Bakdil NGO, u Father Sunny Mavellil, Rongram BDO, MR Marak, Parish Priests, ki nongïalam shnong bad kiwei kiwei.
Ha ka jingkren u myntri rangbah u la pynkynmaw ïa ka jingtrei shitom jong u Father Sunny Mavellil, uba la sdang ïa ka AGHMCS, da ka jingthmu ban kyntiew ïa ka jinglong jingim jong ki nongrep ha rilum Garo bad u la ïaroh ïa u Mavellil ba u la lah ban pyndep ban shna ïa kane ka ophis hapoh ka shisnem.
U Conrad u la ong ba ki don ki lad bad ki kabu ba khraw tam ha rilum Garo ban wanrah ïa ka roi ka par, ha ka rep ka riang. U la ong ba donkam shibun kiba kum kine ki ‘cooperative society’, khnang ba kin ïarap ban kyntiew ïa ka ïoh ka kot jong ki nongrep bad ïa ka thaiñ baroh kawei.
U Conrad u la ong ba ka sorkar jylla kaba mynta ka long kaba la kloi ban ïarap bad ban noh synñiang da kaba ka thaw ïa ka skhim FOCUS bad FOCUS Plus, ha kaba na kine ki prokram bad ki mat treikam, yn sam ïa ki jingïarap sha ki nongrep kiba don ha ka jylla.
Ha ka jingai jingkren, u Thomas A Sangma, u la ong ba kane ka ophis jong ka AGHMCS ka long kum ka dak ka jingjop jong kine ki ‘cooperative societies’, ha rilum Garo. U la ong ba lyngba kine, yn ïohi ïa ka jingkylla kaba bha ha ka ïoh ka kot jong kane ka thaiñ. U la pynpaw ruh ïa ka jingsngewnguh ïa u myntri rangbah bad ïa u secretary jong ka AGHMCS ba ki la lah ban shna ïa kane ka ophis treikam da ka jingthmu ban wanrah ïa ka jingkylla ha kane ka thaiñ.
Ha ka jingai jingkren, u Father Sunny Mavellil, u la ïathuh ba ka sorkar ka la ai kumba T. 3.30 klur ban shna ïa kane ka ophis bad T.3.65 klur ban thied ïa ki tiar, ki tar na ka bynta ban pynmih ïa ki mar rep khambun shah. U la ïathuh ruh ba mynta lah don kumba 30 tylli ki ‘cooperative societies’, ha rilum Garo.
Ha kane ka sngi u myntri rangbah u la ïoh ban sam ïa ki cheques pisa sha ki nongpynmih ïa ki mar rep, kiba lah rung hapoh jong ka skhim FOCUS.
