SHILLONG:
U Working President ka United Democratic Party (UDP), u la ïathuh ba ka UDP ka la ïaid shaid shaid ban pynkhlaiñ ïalade na ka bynta ka elekshon MLA ka ban long ha u snem 2023, ym tang ha rilum Khasi, Jaiñtia hynrei ha rilum Garo kumjuh.
Haba ïakren tang bad u Kynjatshai, na ka liang u Bah Titos W. Chyne, u la ong ba ka UDP ha rilum Garo ka la ïoh haduh 10 ngut ki briew kiba la ibit ibiang ban long kum ki kyrtong ka seng na ka bynta ka elekshon 2023.
“Ka UDP ka la buh ïa ka sngi ban pynbna ïa ki kyrteng jong ki kyrtong kiba la thikna ban ïoh tiket na ka party, hynrei hadien ba ka jia noh ka jingjia ha Mukroh, ka la pynsangeh noh shuwa ïa kane,” la ong u Bah Titos.
U la bynrap ruh da kaba ong ba ha ka taïew ba nyngkong jong u bnai Nohprah, ka party UDP kan sa pynmih noh ïa kine ki kyrteng jong ki kyrtong kiba lah thikna ban ïoh tiket na ka party UDP.
U Bah Titos u la ong ruh ba baroh ki MLA bad MDC na ka party UDP ki dei kiba la thikna ban long ki kyrtong na ka bynta kane ka elekshon ka ban wan.
Halor ka jingiehnoh u Samuel M Marak, uba dei u MLA ka Baghmara konstitwensi, uba dei ruh u dkhot ka party UDP mynshuwa; u Bah Titos u la ong ba u Samuel um dei u MLA uba la jop na ka UDP, ‘hynrei u la shu pynïasoh bad ka UDP la katto katne snem bad ka jingiehnoh jong u kan ym ktah ïa ka party’.
U Bah Titos u la ong ruh ba ka party UDP haduh mynta ka la ïoh kumba 9 haduh 10 ngut ki dkhot kiba ka lah thikna ba kin long ki kyrtong jong ka party na rilum Garo.
