SHILLONG:
U National President ka National People’s Party (NPP), u Conrad K Sangma ha ka 22 tarik Rymphang u la ong ba ka sorkar ba la ïalam da ka NPP ka la lah ban pynkylla ïa ka rukom peit ki briew ïa ka rilum Garo, la ka long ha ka jylla ne shabar ka jylla, khamtam eh ha Delhi, bad ka la wanrah ruh ïa ka roi ka par ha kane ka thaiñ.
Haba ai jingkren ha ka rally kaba la long ha Mendipathar, North Garo Hills ha kane ka sngi, u Conrad u la ong ba ha kine ki san snem ba lah leit, ki paidbah ki la ïohi ïa shibun ki jingkylla bad ka roi ka par. “Ka rilum Garo ka don ïa ka nam kum ka jaka kaba dap da ki jingeh hynrei mynta kine kiei kiei baroh ki la kylla bad ka la kiew bun shah mynta. Ki briew ki lah ban leh ïa ki kam khaïi khlam kano kano ka jingeh”, la ong u Conrad haba kren ha kane ka rally kaba la long ha Mendipathar.
Haba pan jingkyrshan na ki paidbah na ka bynta u kyrtong ka NPP ha Mendipathar, u Marthon Sangma, u Conrad u la pyntip ruh ba hapoh Mendipathar ka sorkar hapoh ka jingïalam jong ka NPP ka la shna kham bun ki surok ha kine ki lai snem haba ïanujor bad ki 30 snem mynshwa ba lah leit. U la ïathuh ruh ba ki don haduh jan 200 km ki surok hapoh ka PMGSY ba la shna ha kine ki lai snem bad 3.5 lak ngut ki briew ha ki jaka kyndong jong ka Meghalaya kiba la ïoh um haduh ki thliew iing.
U la ong ruh ba ka Meghalaya ka la ïoh jingïaroh na ka sorkar India halor ka jinglah jong ka ban pyndep ïa ki skhim bapher bapher.
U Conrad sa shisien pat u la ban biang ba ka sorkar NPP ka ju buh ïa ki paidbah ha khmat bad ka trei ïa kiei kiei da ka jingbha, u la ong “Kum ka sorkar, ngi ju sdang shwa da ka jingïakren ban pynbeit ïa kano kano ka jingeh jong ki paidbah bad ngim ju pyndonkam da ka bor ban pynbeit ïa ki jingeh”.
U la bynrap ruh ba ki briew ka jylla kin ai ka jingkyrshan ïa ka NPP namar ki la ïohi ba kumno ka NPP ka trei ban weng ïa ki jingeh jong ki paidbah. “Ngim pyntieng ïa ki paidbah da ki ktang suloi. Ngi khamlah da kaba sngap ïa ka jingeh jong ki paidbah”, u la ong shuh shuh.
