Ka aiñ Protection of Women from Domestic Violence Act ka khang ïa ka jingleh beñ ïa ki kurim kynthei

Ia ka jaitbynriew Hynniewtrep la tip kum ka jaitbynriew tipbriew tip Blei. Ia kane ka jaitbynriew la tip ruh kum ka jaitbynriew ha kaba ki kynthei ki ioh na ka nam ka burom, ym tang haiing hasem bad ha ka imlang sahlang. Namarba kane ka jaitbynriew ka shim jait na ka kmie, kiwei ki jaitbynriew ki shim beit ba ki kynthei ki long kiba khlain bad kiba bat ia ka bor ka iktiar ha ki longing longsem jong ki. Kiwei ki jait bynriew ki sngewthuh bakla ba ki kynthei ki long kiba donbor namarba dei maki, kiba bat iaka pla pisa haiing hasem. Dei ma ki kiba leit thied leit pet bad kumta ter ter. Ia kane ka jaitbynriew la tip ruh ka jaitbynriew kaba tip ia ka akor ka burom. Hynrei, kane kam dei baroh ka jingshisha. Kane ka long namarba ka don pat sa kawei ka jingshisha bad kata ka long ba ki kynthei ki long kiba tlot. Ki jingtip kiba ngi lah ban lum ki iathuh ia ngi ba bun ki kynthei jong kane ka jaitbynriew ka jong ngi, ki shah leh bein leh khoh, ki shah byrngem byrsit, ki shah shoh shabat bad ki shah ieh khunrei. Kine ki dei kita ki jingeh bad ki jingjaw ummat, ba ki longkmie jong ka jait bynriew jong ngi ki mad jar jar ha kine ki longing longsem ki jong ngi. Kiba kum kine ki longkmie bad jong ngi, kim nud ban iathuh iano iano. Lada ki iathuh ki lah ban shah mad arshah ki jingeh. Lada ki iathuh ia kita ki jingeh jong ki, mano ba ai jingiada ia ki. Ki don ki khep ha kaba ki longkmie ki jong ngi, ki shah byrngem byrsit bad shah dawa pisa na la ki jong ki kurim. Kine ki dei ki jingshisha jong ka jingim. Kawei ka jingshah thom bor jong ki longkmie ka long ba ki hap ban pyndem ha la u jong u kurim lada ki mon lane kim mon. Nalor ka jingbym biang ha iing hasem, ka kynthei kan hap ruh ban shim ia ka jingkitkhlieh ban ri ban sumar bad ban pynbiang ia kito ki khun babun jong ki. Ki don kiba ong ba ki kynthei kiba ia kynduh ia kine kum kine ki jingeh ki lah ban ieh noh ia kita ki lok jong ki. Hynrei, kane ruh ka long kaba eh. Lada ka phet noh da uta u lok jong ka. Kan hap ban shim ia ka jingkitkhlieh halade ban ri ban sumar ia kita ki khun babun jong ka. Kawei ka jingshisha ka long ba ain Protection of Women from Domestic Violence Act, ka khang bad ka pynshitom ia ki kurim shynrang kiba leh bein leh khoh ia ki kurim ki jong ngi. Ha kaba ia dei bad kane ka jingeh, ki longkmie ki jong ngi, kiba iakynduh ia ki jingeh ki jong ki ha ki longiing longsem ki jong ngi, ki lah ban leit wad jingiarap na ki One Stop Center ba ka Sorkar ka la buh ha ki jaka ai jingsumar. Kine ki One Stop Center ki lah ban ai jingmut ym tang ia ki kynthei kiba shah leh bein leh khoh. Hynrei, ia ki kurim shynrang ki jong ki, khnang ba kin lah ban wan sha ka jingsngewthuh jingmut bad ba kin lah ban ia imsuk im sain kum shiiing shisem. Kine ki longkmie ki dei ruh ban tip ba ka ain Protection of Women from Domestic Violence Act, kam teh tang ia kito kiba la iathoh shongkurim kat kum ka ain, la ka long ha Iingmane lane kat kum ka ain jong ka Sorkar. Kane ka ain kateh ruh ia kito kiba shu iashong kha kumto khlem da pyndep kat kum ki kyndon iathoh jong ka ain. Kane ka ain ka kren shai kdar ba ki kurim shynrang ki dei ban ai ia u bai bam na ka bynta ki khun lada kim iashong shuh bad ki kurim ki jong ki.