RI-BHOI:
Ka Young Mind kaba dei kawei na ka seng trei mon sngewbha jong ki samla ka thaiñ Ri-Bhoi bad kaba ju peit ju khmih ban ai ïa ki jingïarap ba ha rukom ïa ki long ïing kiba kham duna ka jingïoh, mynta ka kynti kum ka dak ka jingburom ïa uwei u riew khraw jong ka Ri-Bhoi uba la wanrah bun bah ki jingkylla hapoh ka Ri-Bhoi District, uba la long teng ruh kum u Myntri Rangbah ka Jylla bad mynta u dei u Chief Adviser jong ka Sorkar jylla u Dr. DD Lapang uba ki paidbah ka Ri-Bhoi ki ju tip ruh kum u kpa ka Ri-Bhoi mynta ka sngi na ka liang ka Young Mind ka la lah ban pynïeng da u statue jong u Maheh Lapang hapoh ka madan jong ka Ri-Bhoi College ha Nongpoh.
Ka jingpynïeng ïa une u statue kaba la ïoh bor na u Dr. DD. Lapang bad la wan ban plie pyrda ruh da u maheh Lapang hi ha ryngkat ka jingïadonlang da u Symbud Myntri Rangbah ka jylla u Bah Prestone Tynsong, ka Kong Ampareen Lyngdoh kaba dei ka Myntri ka koit ka khiah, u Bah Mayralborn Syiem u MLA ka Nongpoh, u Bah Charles Marngar u MLA ka Mawhati bad kiwei ki riew rangbah ki riew pawkhmat jong ka Ri-Bhoi District.
Ha kane ka sngi la pdiang sngewbha ïa baroh da ka jingrwai tynrai ba la shim bynta da ki khynnah pule ka Ri-Bhoi College ha ryngkat ki jingpynkup burom ïa u DD. Lapang kum u kongsan, u Symbud Myntri Rangbah Bah Prestone Tynsong kum u kongsan, Mayralborn syiem kum u symbud kongsan bad kynthup ruh ïa baroh ki nongshah khot sngewbha ha kane ka sngi kaba kyrpang jong u Maheh Lapang.
Haba ai jingkren ha kane ka sngi na ka liang ki nongkren ki la ai ka jingïaroh ïa ka Young Minds kaba don ka jingmut kaba jngai ha kaba ka la lah ban buh ïa ka jing kynmaw ka ban neh junom ha ka ban sah jingkynmaw ïa u riew khraw uba wan rah shibun ki jingkylla bad ka roi ka par hapoh ka Ri-Bhoi District bad kum ka seng kaba ju don kata ka mynsiem ban ïarap na ka bynta u duk u suk bad ka don kata ka mynsiem trei mon sngewbha ki kit bok kit rwiang ïa kane ka seng ba kan kiew shaphrang bad kin neh ka juh ka rukom trei jong ngi ban ïarap ïa ki ba donkam, khlem da lah ban klet na ka liang ki nongkren ha kane ka sngi kiba la kynthup lang ïa ki nongïalam saiñ pyrthei, ki seng bhalang bad na ka liang ki nongthoh khubor na Ri-Bhoi ki la ai ïa ka jingkhublei bad ka jingsngewnguh ïa u Maheh DD Lapang halor ka kam kaba un trei bad ka jingshakri ka jong u na ka bynta ka Ri-Bhoi District kumba ka long haduh mynta.
Na ka liang jong u Maheh DD. Lapang haba ai jingkren ha kane ka sngi u la ai khublei kyrpang ïa ka Young Mind kaba la kynmaw burom ïa u da kaba buh syndon da u mot dur jong u kum ka dak ban ai burom halor ki kam shakri paidbah kiba u la noh mynta da ki phew snem.
U la ai ruh ïa ki kyntien kyntu kynpham sha baroh kiba la shim bynta lang ha kane ka sngi da kaba pynkynmaw ïa ki kyntien kiba u la jied ha ka jingim jong u da kaba ong ba la kha ïa ngi ban shakri lane “we’re born to served” kumta u la kyntu ïa baroh ban ïaineh ka mynsiem jingkitkhlieh ban shakri para mynsiem briew na ka bynta ban kyntiew bad pynroi ïa la ka ri bad ka jaidbynriew.
Ha kane ka sngi na ka liang jong ka Young Mind ka la pyni paidbah ruh ruh ïa ka jingrwai kaba la rwai da ka kynhun jong ki ban batai lyngkot shaphang ki kam bad ka jingshakri paidbah jong u Maheh Lapang ïa ka District bad ka jylla baroh kawei.
