NONGPOH:
Kawei ka longkmie ka ba la tip kyrteng kum ka Edwina Lyngdoh Lyngkhoi 52 snem ka rta, na ka shnong Umran Dairy, ka la khlad ha shen hadien ba ka la shah bat ha ka bording elektrik .
Kane ka jingjia kaba ishyrkhie ka la jia myn ha ka 13 tarik Rymphang 2024, ha ka por ba kane ka longkmie ka la shah lymbat ha ka bording electrik ha kawei ka jaka khlaw kaba kham pajih na ka shnong katba ka dang leit wat jhur na katei ka jaka ha ryngkat bad la ka khun.
Kane ka longkmie ka dei kaba sah bad ka khun bad ka dei kaba ju im ruh ka jingim da kaba leit wat ïa ki jhur na ki khlaw ki btap ban pyndap pynbiang ïa la ka ïing ka sem, hynrei ha katei ka sngi katba ka dang leit ban wat ïa ki jhur khlaw ha ryngkat bad la ka khun ka la kum leit ïuh ïa utei u sainar light uba la dkut bad thiah lyngktar ha madan bad ka jingkhlaiñ jong ka bording electrik ka la lympad ïa katei ka longkmie haduh ba kan duh ei ïa la ka jingim.
Ka khun jong katei ka longkmie ka la ïathuh ba katba ka dang don ha katei ka jaka ka la ïoh sngew ïa ka jingsawa bad ka la mareh ban peit bad ka la lap ba ka kmie jong ka, ka la shah bat ha ka bording electrik bad kumta mar mar ka la ïaleh ban pyrta bad ban wat jingïarap na ki briew kiba marjan ban pan jingïarap bad ban pynlip ïa ka light. Hadien ba poi ki para Shnong ki la pynkit noh ïa ka met sha Civil Hospital ban leh ïa kaba donkam.
Naka liang u Rangbah Shnong ka Umran Dairy u Bah Lambor Mukhim Bina, u la ïathuh ba mar ïatip ïa katei ka jingjia ki la leit bak bak sha katei ka jaka bad ki la lap ba katei ka longkmie kaba la shah bat ha ka ding electrik ka dei halor kadaw ba utei u sainar light u la dkut bad u la hap ha madan, bad u la pyntip ruh ba na ka liang ki bor pulit ki la pynkit noh ïa katei ka met sha Civil Hospital ban leh ïa ka post Morten.
Katkum ka jingïathuh u Rangbah Shnong u la pyntip ruh ba utei u sainar light lehse um dei uba la dkut slem, namar kam shem la don kano kano ka jingthud ha ka light hapoh ka Shnong.
Na ka liang ka u Rangbah Shnong u kyntu ïa ki bor ba dei peit ïa ka bording electrik ba kin peit pyrman bha ha kaba ïadei bad ki sainar light bad ban ot tikna ruh ïa ki dieng ki siej kiba mar jan bad ki sainar, namar bun ki jingjia kiba sngewsih kiba kum kine ki shait jia namar ka jingia tyngkhuh ki dieng ki siej ïa ki sainar light.
