Ka Election Commission ka la pynbna ïa ka tarik sngi thep vote ha Meghalaya ha ka 27 tarik u Rymphang ban wan ryngkat ka Nagaland bad 16 tarik ha Tripura, kiba dei ki jylla ka thaiñ shatei lammihngi ka India. Katkum ka kyndon Model Code of Conduct (MCC), shisien ba la pynbna ïa ka elekshon, ka aiñ ka la treikam, ban mana, ban khang, ban pyrkhing ïa kino kino ki jingpyrshang ban khroh ban khring ïa ki paidbah da ka bor jong ka pisa. Katkum ka aiñ, u kyrtong u lah ban pynlut haduh 28 lak tyngka bad ïa kane, dei ban ai jingkheiñ thik pa thik sha ka tnad elekshon, haba pyllong ïa ka jingïalang, ïa ka jingdon ki shuki, ki briew, ki jingbam, ki tiar pynsawa, bad kumta ter ter. Kampher ban pynlut namar ban pyllong ïa ka jingïalang, ban ïadih sha, ban shon kot, ban leit ban wan da ka kali da ka motor namar ba kane ka dei ka bynta ban leh kumta.
Hynrei kaba kham kongsan hangne ka long ba kumno ka tnad election commission kan tehlakam ïa ka jingpynlut ïa ka pisa ban thied vote, ban pynbiej da ki jingai sngewbha, kiba treikam harieh harieh. Ka don ka jingbuh jingkylli ruh, ha kano ka rukom yn tehlakam ïa ka jingsam pisa ban thied vote, haba ki briew ki leit ïakynduh sop sop sha khlaw, sha ïing briew, ne sha kano kano ka jaka namar ba ki ïasngewthuh jingmut. Hooid, ka tnad Election ka la bthah ba kino kino ki paidbah ki lah ban shon dur, ban ring video lada lap ïa kiba sam pisa, kiba thied vote hynrei haduh katno kan shim kam ïa kiba leh kumta lada dei kaba shisha. Kane ka dei ka jingkylli kaba eh ïa ka tnad Election ba kan jubab. Namar ka jingbym lah ka Election ban pynshitom kum ka nuksa ban pynduh ïakhun ïa ki kyrtong, kan pynduh mynsiem ïa kiba ujor ne ka lah ban buh jingma kylla pynban ïa kiba ujor.
Kumta, ka la donkam ïa ka tnad Election ba kan kham ioh ïa ka bor kaba khlaiñ khnang ba kan ym long kum u khla kot khlem dait.
Ha kane ka juk stad mynta, ka la kham suk ban peit pyrman, ban phikir, ban tehlakam namar ba ka la suk ban phah jingtip ha ka rukom kaba sted mardor na ka jingdon ka internet mobile, ha kaba u briew tang da kaba shu klik tiak, la ïoh ïa ka dur, la ïoh ïa ka video ban ïeng kum ki sakhi. Kum ka jingai jingmut, ka tnad Election ka dei ban don ki Special Volunteers ha man ki shnong na bynta ban peit ban phikir ïa ka kam elekshon haduh ka sngi thep vote, bad kine kin ïatreilang bad ki bor shnong, ki seng samla, ki longkmie ban pynthikna ba ka jingsam pisa ne ka jingpyrshang ban thied ïa ka vote da ka bor jongka pisa, kam dei ban jia, bad dei ban khang lad shi syndon. Lada don ki volunteer kiba biang, kata ka mut ba ka jingjied ne ka jingpyllong ïa ka elekshon kan kham long shisha kaba khuid, kan pyntieng pynsmiej ïa ki riew shim kabu, kiba thmu ban thied da ka bor jongka pisa, bad ïa ki riew bymman kiba thombor ïa ki riew lui lui.
