Ka bor pynkhiah ka kilan met Yoga

Sa shisien, ka 21 tarik u Jylliew mynta ka snem kan sa long ka sngi ka ban san jingkynmaw ha kaba u Myntri Rangbahduh ka India, u Narendra Modi u la ïalam ïa ka jingrakhe ïa ka jingkilanmet ka 9th International Yoga Day ha Sorbah New York jong ka America, kaba long ruh ka Headquarters jong ka United Nations. Katei ka sngi ka dei ha kaba baroh ki ri jong ka United Nations ki la ai ïa ka jingmynjur jong ki ïa ka jingrakhe ïa ka International Yoga Day bad ai jingmut da u Myntri Rangbahduh Narendra Modi. Ka jingïaroh  na ka bynta ka jinglah ban pyllong ïa ka tei ka sngi kaba khraw shityllup ka pyrthei ka leit sha ka Sorkar Pdeng ba la lam khmat da u Myntri Rangbadduh Narendra Modi. Hynrei, ngim dei ruh ban klet ha kaba kum kane sngi ban ai burom ïa baroh kito kiba la don kti naduh ki por kiba mynshuwa, kiba la pynshlur ïa ka kilanmet Yoga kynthup ruh ïa u Myntri Rangbah bamynshuwa, u Jawaharlal Nehru. Ka long kaei kaei kaba sngewtynnad, ym dei tang ban tip, hynrei ban ïohi da la ki jong ki khmat ba u Myntri Rangbadhuh Narendra Modi u la ïalam ïa ka 9th International Yoga Day ha kaba la ïa shim bynta da ki 150 tylli ki ri jong ka pyrthei. Ka long kaba sngewtynnad ba ha kane ka kilanmet la ïashim bynta da ki tyngshop bapawnam ka Hollywood kum u Richard Gere, u Moyor jong ka New York Eric Adams, ki nongtem nongput kum u Ricky Kej bad Falguni Shah, u nongthoh jingïathuhkhana u Jay Shetty, u nongshet bapawnam u Vikas Khanna bad kiwei. Ka jingkilanmet Yoga, ka long kaba la pdiang da ka India bad ruh da ka pyrthei. Kane ka jait kilanmet ka long kaba dei ban pynshlur. Kane ka jingkilanmet ka pynïoh ïa ka jingkoit jingkhiah ïa ka met bad pynjai-jai ïa ka mynsiem. Ka jingleh ïa ka kilanmet Yoga da kaba pyndonkam ïa baroh ki dkhot met, ka ïarap ban pynwandur ïa ka met jong u nongleh. Ka Yoga ka donkam ïa ka jingpynleit jingmut bad jingpuson bad kane ka wanrah ïa ka jingjai-jai jong ka jingmut jingyrkhat.  Da kaba leit ïa ki jingkilanmet bapher bapher, ka Yoga ka ïarap na ka bynta ka jingpynkhlaiñ ïa ka jingring mynsiem. Ym tang katta, lyngba kane ka jingkilanmet, ka pynkhlaiñ bor ruh ïa u budlum, uba long ka bynta kaba kongsan haduh katta katta ban kyrshan ïa ka met baroh kawei. Kito kiba la pyllut bun ka por bad ki jinglum jingtip jong ki, ki pynshisha ba ka jingkilanmet Yoga ïarap ban pynkhiah ïa ki babun ki jingpang bad pynjah ruh ïa ki jingktha. Bun ki jingpang ki nang jur na kawei ka por sha kawei pat. Kane ka long ba ki nongpang ki pyrkhat palat shaphang ka jingpang jong ki. Katba ki nongpyrkhat, katta ka jingpang ka nang jur. Kane ka jait jingkilanmet, ka ïarap ïa ki nongpang ban kdat ïa ki jingmut jingpyrkhat jong ki na ki jingang. Kane ka jait jingkilanman kaba ïarap ïa ka jingpynkhih ïa ki dohksah bad ïa ki thied ki jaw ka ïarap ban ïaleh pyrshah ruh ïa ki jingpang kiba don ha ka met jong ki briew. Ki jingwad bniah bad ki jinglum jingtip ki iathuh ia nga ba ka long ka jingshisha ba ka jingkilanmet Yoga ka long ka jingpynkhiah ia ka jingang bym lah ban pynkhih ia u ryndang bad pynlait ruh ia kiwei ki jait jingkjat. Kane ka jingkilanmet, ka la long ruh ka jingiarap kaba khraw ha kaba pynduna ïa ki jingktha bad jingpynwit pynthud babun jait jong u budlum. Kane ka jait jingkilanmet Yoga ka iarap ia ngi ba khih bad ksaw khlem da don ka jingpynthud pynwit ia ka met ka jong ngi.