Ka elekshon ha ka ri India ka ju wan shisien ha ka san snem katkum ka riti synshar ka ri naduh u MLA, MP, MDC ha kaba ki paidbah ki hap ban pynthymmai ne jied ia ki nongthawaiñ kiba thymmai katkum ka jingstad bad ka jingtbit jongki. Ka jylla Meghalaya kan jied ia ki MLA ha ka sien kaba khadwei ha kane ka elekshon kaban sa wan ha u snem 2023. Ha ka por elekshon, ki seng sain pyrthei bapher bapher kin mih ban buh ia ki mat elekshon bapher bapher hakhmat ki paidbah ba kin bishar, bad kine ki mat elekshon ki long na bynta ban wanrah ia ka jingbha jingmiat, ka roi ka san, ban kyntiew ia ka roi ka par, ka ioh ka kot, ka pule puthi, ka lynti ka synkien, ban iada ia ki briew bad kumta ter ter.
Ym tang ba ki sei ia ki mat elekshon ban tyrwa ha khmat u paidbah, hynrei ka jingiather ka jingiakynthoh bad ka jingiakam ba kham lah, kham biang, kham bha kawei ia kawei pat. Ka elekshon ka dei ka kam jong u paidbah, bad dei na kane ka daw, ba ka la wanrah ka jingshongshit ka jingiapyni nia na bynta kaba kham sha kaba kham bha. Kane ka jingiadon bynta ki paidbah naduh ki samla haduh ki tymmen ha ka elekshon, ka dei ruh shi bynta jong ka tamasa ba heh tam ka synshar paidbah ha ka ri bad ym pat don kano kano ka tamasa kaba heh tam ha ka ri lait na ka elekshon. Ha ri India uno uno uba la kot ka rta sha ka 18 snem, u la lah ban iashim bynta ban jied ia ki nongthaw ain, katba uno uno uba la dap 21 snem ka rta, u lah ban mih ban iakhun ia ka elekshon kum ki kyrtong lait noh tang kiba khang ka ain.
Haba phai sha kane ka jylla Meghalaya, la sakhi ba ka jingjied ia ki nongthawain ne MLA, MP, MDC ka iapher bha na kiwei pat ki jylla ha ka ri India. Hangne, la sakhi ba ki paidbah kim ju kham jied ia ka party hynrei ki bishar bad ki peit ia ka jingtbit, jingiadei, jinglah ban pyniadei briew, ban iarap, ia ki briew bad ki ju kham bishar ia ki mat elekshon bad dei na kane, ka daw, bun ki kyrtong shimet ruh kiba jop elekshon. Kawei kaba kham pynioh lad ia ki kyrtong shimet ha kane ka jylla, ka dei namar ba ki konstitwensi ki duna ka jingdon ki nongthep vote ban ianujor bad ki konstitwensi sha ki jylla ri thor. Hangne ha jylla Meghalaya ki nongthep vote ki don kumba 30 hajar eiei kawei ka konstitwensi katba sha ri thor, kawei ka konstitwensi ka don da ki lak ngut ki nongthep vote.
Ka jingduna ka jingdon ki nongthep vote, ka la pynsuk ia ki heh spah ban thied kumba thied mar na iew ia ki briew kiba biej pisa. Ka jingbiej pisa ki paidbah ka la pynhiar dor khait ia ka rukom jied ia ki nongialam ki nongthaw ain bad kane ka la pynkynrandien noh ia kito ki riew shemphang, ki riew tbit ban iamih shakhmat namar ba ki kwah ban shakri hok da ka jingkhuid bad ka jingkitkhlieh bad dei hangne ba la ioh bsuh khlieh ki khwan myntoi shalade ban pynbiej ia ki paidbah da ka jingmut arsap shapoh ynda la jop, kin sa pyllong ia ka kam shakri paidbah kum u shabuk ban pynheh ia ka kam kamai spah jongki, bad noin ia kito kiba ki ishan khmat ba kim dei ki nongkyrshan ne ia ka shnong ne thain ba ki ioh duna vote. Ka pisa ka la pynjaboh ia ka politik. Kawei ka lad ban pynduna ia ka bor jong ka pisa, ka long ba ki paidbah nongjied kim dei ban shah thied ha ka pisa, bad dei ban pyndonkam kumba ong mano re, “ka pisa ha pla, ka vote ha jabieng’
