Ha kine sngi ba la dep, ki paidbah nongshnong shnong jong ka jylla ki la don hapdeng ka jinglynga ka jingpisa kaba khraw na ka daw jong ka jingïakhih jong ka seng saiñ hima sima Voice of the People Party, kaba la dawa ba ka Sorkar ka dei ban peit biang ïa ka bhah ïoh kam ïoh jam jong ki nongshong shnong ha Meghalaya. U nongïalam jong ka VPP u Bah Ardent Basiawmoit u la hap ban shah thngan ha khmat ka Additional Secretariat haduh phra sngi kynthih tang na ka daw ba ka Sorkar ka kyrngah ban ïakren shaphang kane ka kam. Hynrei, mynta ba ka Sorkar ka la pdiang ban ïakren, ïathir, ïatai halor ka bhah ïoh kam Reservation Policy, une u rangbah ruh u la weng ïa ka jingshah thngan jong u bad ka imlang sahlang ruh ka la long jai jai biang. Ka jingshim rai jong ka Sorkar halor kane ka phang ka dei kaba biang eh. Yn jyn da dei ba ka Sorkar ka la shim ïa kaba kum katei ka rai kham shuwa jong katei ka por, kan jyn da la kham bha shuh shuh. Ka jingpyntrei kam ïa ka Reservation Policy kaba ïabud ryngkhih bad ka Roster System ka la sdang naduh ka snem 1972 bad kane ka la ïaid mynta sanphew wei snem. Ha kine ki sanphew wei snem kiba la dep, la mih ruh bun ki jingkylla. Lada ngi peit ïa kane ka imlang sahlang jong ngi, ngi ïohi ïa ka jingkylla kaba bun bah.
Ha kane ka jingkylla, ngi la nang jam sha khmat na ka shet ja da ka dieng ïap ka dieng thlieh sha ka shet ja da ka ding elektrik bad gas. Ngi la kylla na ka tem jingrwai da ka Gramaphone sha ka sngap jingwai da ka Mobile Phone. Ha ka juh ka rukom, ki nongïakhih ruh ki la sngewdei ba ka dei ban don ruh ha ka jingkylla ha ka Reservation Policy namarba, katei ka bhah thung kam thung jam, ka la noh shiliang tang sha kawei ka jaitbynriew. Sanphew wei snem mynshuwa, lehse kawei ka kynhun jaitbynriew ha kata ka por ka dang biej dang them, hynrei mono ban tip, lehse mynta ka la ïaryngkat bad kiwei ki jaitbynriew kiba la nang la stad bad kiba la ïaid shakhmat. Dei halor kane ka nongrim ba ka don kam ïa ka jingïakren sani halor ka Reservation Policy. Kane ka jingïakhih jong ka VPP ruh ka long kaba dei por bad kan long kum ka jingpynkhreh ïa ka jingmut jingpyrkhat jong kiwei ki jaitbynriew ba kin long kiba la khreh ban pdiang, lada dei kata ka por ban ïa peit ïa ka jingïabit ïa biang lang.
Kane ka jingïakren shaphang ka Reservation Policy ka donkam bha ïa ka jingïakren sani namarba kane ka phang ka don ka jingïadei bad ka aiñ bad ki jingbatai ïa ki kam. Ha kane ka jingïakren, ka jingïaphylliew jingmut, ka long kaba donkam haduh katta katta ïa ka jingdon bynta jong ki ‘riew said aiñ bad ki muktiar kiba don ka jingsngewthuh kaba jylliew halor kane ka phang, ba kawei kaba ki ai jingmut, ka dei ban long na ka bynta ka jingïabit ïabiang lang. Ki jingai jingmut jong ki, ki dei ban long kiba thikna shispah na ka shispah ba kin ym kyrtoh kylla. Kane ka jingïakren ka donkam ïa ka jingïashim bynta jong ki ‘riew shemphang na ka jingpule Sociology, namarba kane ka phang ka ktah, ia ka imlang sahlang, ka ktah ïa ka jingbun paid jong ki jaitbynriew bapher bapher. Kane ka jingïakren ka donkam ïa ka jingiashim bynta jong ki stad ka thoh ka pule bad ruh ïa ki stad ka ïoh ka kot.
