Ka jingpynjari ka bor district ka East Khasi Hills ïa ka 144 CrPC ka la paw ba ka la pulom namar ba ka jingpynkheiñ ïa ka. Ha ka jing-shisha, katkum ka hukum, ka DC ka la mana ban ïalum briew palat ïa ka san ngut ha kylleng ki jaka ha sor bad ha khapsor hadien ba ka la mih ka jinghuri hura na ka jingïaid paidbah ka FKJGP ha u bnai ba la dep halor ka jingïoh kam ïoh jam jong ki samla. Mynta ka sngi, ki san seng kila pyllong ïa ka jingïalum bun paid ha phyllaw u mot u Kiang Nangbah ban pynrem jur ïa kane ka jingjia ha Mukroh.
Ka jingjia ha Mukroh haduh san ngut ki briew kila shah siat ïap ha ki pulit Assam, ka la dei ka jingjia kaba sngewsih haduh katta katta bad ka la pynpang mynsiem bym lah shuh ban batai khamtam ïa kiba haïing, ïa ki samla, bad ki paidbah. Kane ka jingjia ka la pyllong ïa ki paidbah ban pynbitar ban ïohi ba ki para jait kin shah lehbeiñ shah lehsat. Kumba ju long ka nongbah Shillong, ka dei ka ktem ban pyllong ïa kano kano ka jingïakhih ban pynsngew sha ka sorkar namar ba ka dei ka jaka shong ki khlieh nongsynshar ha ka jylla. Kano kano kaba pynsngew ha ka nongbah Shillong, kan kham poi kloi sha ki tyngdong shkor ki nong-ïalam ka jylla halor kano kano ka mat.
Mar ïa mih ka jingjia ha Mukroh, ka nongbah ka la khih puk ha kaba ki kynhun bapher bapher kila mih ban pynrem jur, ka jingïalum, ka jingpyndeng lama bad sha kiwei ki district ruh kumjuh ïa kane ka jingleh riewkhlaw ki pulit ka Assam ban shu siat ïa ki mynsiem briew khlem da pyrkhat. Ka sorkar Meghalaya wut wut ka la pynsted ban dawa tohkit da ka CBI ne ka NIA halor kane ka jingjia bad ka la pyntip ruh sha ka sorkar Assam halor kane, ha kaba ka Assam ruh ka la pdiang ban ïatreilang. Ym tang katta, u Myntri Rangbah u Conrad K Sangma lem bad ki myntri sorkar, kila her wiaw sha Delhi ban ïakynduh ia u Amit Shah ban dawa ban tuklar halor ka jingjia ha Mukroh. La sngewthuh ba kane ka jingjia, kan lah ban ïadei bad ka kam pynbeit pud hapdeng ka Meghalaya bad ka Assam namar ba katei ka jaka, ka dei kawei kaba don hapdeng ka jingïakajia.
Kumba ju sakhi, ki paidbah ka thain Jaintia Hills ne ka Block-I bad kumjuh ka Block-II kaba hap ha Ri-Bhoi ki kwah ban wan sha Meghalaya hadien ba kila shah kynthup da ki phew snem ha ka jaka ïakajia bad ka Assam bad ka la ju mih ruh bunsien ka jingjia ha katei ka thaiñ namar ki paidbah kim kwah ban leit sha Assam kumba la wan kyntur ka Assam man ka por. Mynta ka sorkar MDA jong u Conrad, kan hap ban sngew-thuh ban seng ïa ka nongrim kaba khlaiñ bha ban ïasaid thma bad ka Assam halor u pud u sam, namar ba ka Assam kumba ka paw, ka ju pyneh beit triang ban kam ïa ki jaka ka Meghalaya watla ki paidbah kim kwah satia. Don ki jaka ba ka pynshlur da kiwei ki jaitbynriew kumba jia sha Langpih tang ban ïoh wad daw ïa ka Meghalaya. Ha ka jingpynbeit pud kaba ar, ka sorkar Meghalaya ka dei ban pynskhem ba ka Block-I bad Block-II ka dei ban wan kumba kwah ki Khasi-Pnar ym ban shah pynthame ha ka Assam.
