Ha kine ki khyndiat snem ba la dep, ki khun u Hynñiewtrep u Hynñiew Pansngiat, kim shym la salia shuh wan ban shah ïa ka jingther jong u ‘lapbah ban pynsngew sha ki bor jong ka aiñ, sha ki bor Sorkar bad sha ki seng saiñ hima sima, bad ki Dorbar Shnong ba dei ban don ki aiñ ki ban pynim ïa la ka jong ka jaitbynriew. Um tang katta, ki dkhot bamynshuwa jong ka Khasi Hills Autonomous District Council, ki nongïalam jong seng bhalang, kynthup ïa ki dkhot ka seng saiñ hima sima, ki la pynlong ïa ki jingshah thngan ban pynsngew sha ka Sorkar ïa ka jingdonkam ban pynkup bor ïa ki Dorbar Shnong bad ïa ki Rangbah Shnong khnang ba ka synshar shnong kan long kaba ïaid beit ïaid ryntih, kumba la seng la buh u ‘ñi u kong. Hynrei, haduh mynta, ngim pat ïoh ïa kata ka aiñ Synshar Shnong ka ban pynhun hi jrut ïa ki paid. Dei ban pynim biang ïa kitei ki jingsngew. Kane ka thong kaba hakhmat eh ka dei ban long ka jaitbynriew. Ki nongmih khmat jong ngi, ki dei ban sngewthuh ba ka shuki ka long tang shi por. Hynrei, lada ki lah ban shna ki aiñ kiba lah ban pynim ïa ka ri bad ka jaitbynriew, ka kyrteng bad ka nam jong ki kan ïai sah pateng la pateng.
U Myntri ki ka main bamynshuwa jong ka Sorkar Meghalaya, U Bah Martin Majaw, u la tei ïa la u jong u mot sah kynmaw da kaba wanrah ïa ka aiñ Land Transfer Act, kaba khang lad ïa kiwei kiba ym dei ki trai muluk ki trai jaka ba thied jaka ha kane ka jylla. Mynta sa tang khyndiat sngi, kan sa don ka jingjied ïa u dkhot jong ka ïing Dorbar Thaw Aiñ jong ka Meghalaya na ka bynta jong ka Sohiong Assembly Constituency. Kane ka jingjied nongmih khmat kan long ha ka 10 u Jymmang bad ka jingñiew bad ka jingpynbna ia ka result kan long haka 13 tarik u Jymmang mynta ka snem. Ym tang katta, sa tang katno ngin hap ban jied ïa ki nongmihkhmat sha ka Khasi Hills Autonomous District Council bad ruh ka Jaintia Hills Autonomous District Council. Ha kaba kum kine ki por, ki nongthep vote ki dei ban buh jingmut ba ka thong kaba ha khmat eh jong ngi, ki dei ba kine ki nongmihkhmat jong ngi, ki dei ban shna ïa ki aiñ ki ban ïada, ban pynim, ban pynneh ïa la ka jong ka lariti bad ka jaitbynriew.Ka jingjied ïa ki nongmih khmat ka dei ka kam kaba kyntang. Ka jingjied jong ngi ïa ki nongmihkhat ka dei ka hok jong ngi kaba ngi ïoh na ka jingsynshar paidbah. Ki bun ki nongshong shnong ha ki ri ba synshar da ki shipai bad ha ki ri ba synshar da u nongsynshar lahduh, katno ki thrang ban ïoh ban jied ïa u nongïalam jong ki da ka jingthep vote. Hynrei, ma ngi pat kiba ïoh ïa kane ka lad, teng teng ngi klet noh ïa ka jingkordor jong ka jingsynshar paidbah. Teng teng, ngi sngew ba tang kawei ka vote jong ngi kam lah ban thaw pyrthei.
Hynrei, kane kam dei ka jingshisha. Hynrei, lada pynlang ïa kita ki vote ki kylla bun bad ki lah ban wanrah ïa ka jingkylla ha ka seng saiñ hima sima. Don kiba ym treh ban leit thep vote namarba kim sngewdonkam ïa ki MLA bad ki MDC jong ngi. Ki ba nang bastad kim smat ban leit thep vote bad ki sngew ba ka jingleit thep vote ka dei ka kam jong u luk u lak. Kane ruh ka long ka jingsngewthuh bakla. Ka nongrim jong ka jingjied ïa ki nongmihkhmat ka long ban wanrah ïa ki jingkylla na kiei kiei kiba bha sha kiei kiei kiba kham bha. Ka jingjied ïa ki nongmihkhmat ka long ban saiñdur thymmai ïa ka imlang sahlang. Ka jingjied jong ngi ïa ki nongmihkhat shisien san snem ba kin ïoh ïa ka lad ban shakri ïa ki paidbah. Lada ngim sngewtynnad ïa ki, ki lah ban jied noh da kiwei. Hynrei, ka thong kaba hakhmat duh jon ka jingjied ïa ki nongmihkhmat ka long ba kin shna ïa ki aiñ ki ban kyntiew ïa ka ri, ka jait bynriew bad ïa ka jylla. Dei na kane ka daw ba ngi ong, ba ngi jied ïa ki nongmihkhmat sha ki ïing Dorbar Thaw Aiñ, ka mut ba ka kamram jong ki nongmihkhmat ki long ban shna aiñ bad kiwei kiwei ki sa bud hadien.
