Man ka elekshon shisien ha ka san snem ka ju don ka jingïakhih khoh-reh jong ki nongsynshar kiba don ha ka bor sorkar ban thung maw nongrim, ban plie pyrda, ban khap ribon, na bynta ki kam pynroi kiba ym tip kiban long kam ne em. Ha kine ki sngi, kane ka sorkar ka la plie ïa ki Civil Sub-Division, ïa ki Community and Rural Development Block, ïa ki PWD Division, ïa ki Police Outpost, ia ki Police Station, bad bun kiwei pat ki jait jingplie. Ka elekshon kan sa wan sa kumba ar bnai ban thep ïa ka vote, bad ki myntri sorkar, kiba don ha ka bor, kila pynshongshit man ka sngi da ki prokram ba lai phew jait bad ki paidbah ruh ki sngew muja bha namar ba ïoh bai kali ei, ïoh sha, ïoh dud bad don lei kiba kham leh shalak, ki ai bai sngi tang ban wan sha ka jingïa-lang ban pyni ïa ka jingbun briew khnang ba kiba ïaleh pyrshah kin tieng kin syier.
Ym tang katta, ka jingsam sniang, sam syiar, ka sorkar kam dei kaba sniew na bynta ka jing-thmu kaba bha ban kyntiew ïa ka ïoh ka kot jong ki nongrep bad kumjuh ka jingsam ïa ka pisa sha ki Self Help Group (SHGs), ki Producer Groups (PGs) khnang ban kyntiew ïa ki nongkyndong ki nongrep. Hynrei ka rukom leh ka sorkar ka long kaba bakla, I kumba ka dei kaba shu leh kyrkieh tang ban ïoh burom, bad ka jingkwah ka long beit tang ban paw pyrthei ba la sam ba la ai hynrei khlem kano kano ka jingbuddien kaba thikna, khlem pyrkhat bha shwa ban leh. Mynta bun ki sniang ki syiar kiba ïap noh tang shu poi ha sem. Kane ka jingleh ka long kaba bakla, ka long tang kum ka tamasa leit pdiang khusnam ha ka por ba pyllong ïa ka tamasa. Ka jingsam ïa ki jingri jingdup kam dei ban long kum ka kam tamasa, ka donkam ïa ka jingpule bniah ïa ka jinglong ka jaka ka puta, ka jing-long ka suiñbneng, ka mariang, bad ka rukom im jong ki jingri katkum ki jaka khnang ba kin lah ban im, ban heh ba kan long ka jingmyntoi shisha ïa kiba pdiang ïa ki.
Ong katba ong, kiba don ha ka sorkar kim dei ban sngew rem ba kane ka jingleh shongshit tang shwa ka elekshon, kam dei ka kam kaba mut hok shisha hynrei ka dei ka kam kaba thmu ban shu pynbiej ïa ki paidbah bapli kiba shisur shidur. Ka jingkwah sam sniang, sam syiar ki myntri sorkar kam don jingmut than, namar ba kim ym lah ban heh ban sngaid plung bha na ka kti jongki hynrei lada ka sorkar ka mut shisha, ka dei ban leit sam ïa ki sha ki man ki shnong, ban jied hok ruh ïa kiba dei hok, kiba don ka jingthmu, kiba la ieid ïa ka kam ri jingri, ym ban shu ai katba dei u nongkyrshan ka party khnang ban pynbiej san snem. Ka jingjied da ki nongïalam ka party ïa ki briew ban ïoh skhim, ka long kaba bakla bad ka dei tang ka jingmut ban thied vote, ym na bynta ban kyntiew ïa ka ïoh ka kot, ka kamai kajih jong ki nongshong shnong. Ka jingpynlut ka sorkar kumba 16 klur tyngka ban thied sniang thied syiar nabar jylla, kam dei shuh kaba kai bad kam dei ban long ka jingkitkhia ïa ka jylla hynrei ka dei ban long ka jingpyn-sting ia ka jingdonkam sniang, syiar ka jylla ha ki snem ban wan bad lada kam long kumta, ka long kumba theh kai ïa ka pisa u paidbah tang ban pynsngewbha.
