Ka Meghalaya High Court ba donburom ka la pynmih ïa ka rai kaba biang ha ka por ban pynduh pyn-dam noh pyrshah ïa ka rai bym shongnia ne shong nongrim jong kane ka sorkar Meghalaya Demo-cratic Alliance (MDA) kaba don lang 7 tylli ki seng saiñ pyrthei hapoh ka jingïalong Captain ka NPP bad Vice Captain ka UDP, halor ka jingïashim bynta ki nonghikai bym dei sorkar (govt. aided teachers) ha ki kam saiñ pyrthei. Kane ka rai jong ka Kashari ba heh duh jong ka Megha-laya ym tang ba ka pynkhie im bad ai mynsiem biang ïa ki nonghikai bym dei sorkar hynrei ka dei ruh ka rai kaba la pynim biang ïa ka hok bad ka jingangnud ban shakri ne trei jong ki nonghikai ban ai lem ki jinghikai, ki jingpynsngewthuh paidbah ha ka kam saiñ hima-sima baroh.
Shwa ban mih kane ka sorkar MDA, baroh ki nonghikai bym dei sorkar ki lah ban shim bynta lait-luid ha ki kam politik katba ki mon ha ki party bapher bapher. Naduh ka por ba long Myntri Rangbah u (L) Capt.W.A Sangma, (L) D.D Pugh, (L) B B Lyngdoh, (L) P.A Sangma, u S C Marak, (L) Dr.F.A Khonglam, Dr. DD Lapang, (L) JD Rymbai, (L) Dr.Donkupar Roy, Dr.Mukul Sangma, kam ju pynwit pynthut satia ïa ki nonghikai ba kin don bynta ha ki kam politik. Hynrei ha kane ka sorkar MDA ha u snem 2018 hapoh ka jingïalam u Conrad K Sangma jong ka NPP, la sdang ban bishni bad pihuiñ da kaba teh bad khum da ki kyndon ba leh pyrshah ia ki nonghikai bym dei sorkar. Ym tang ba ki shun thlong mluh thlong sying ïa ki nonghikai hynrei ki da leh sat ruh ïa ki da kaba pyndik bad pynslem kai ïa ka tulop jongki haduh ban pynthiah miet syndon ha surok Secretariat bad wat ban siat lyer pynsat khmat ruh ïa ki nonghikai kiba pli. Ym tang katta, u Myntri Rangbah bad Symbud Myntri Rang-bah lei lei jong kane ka sorkar MDA ki la kren kop sarong lypa ïa ki nonghikai ba kim lah shuh ban pyllait ba kin shim bynta ha ka kam politik bad lada ki kwah, ki ai jingmut pylleiñ pylleiñ ban leit sha ka ïing Kashari. Dei tang kane ka sorkar kaba shan khmat eh ïa ki nonghikai ha ki kyrdan bapher bapher.
Ka rai jong ka Meghalaya High Court ba donburom ban pynduh pyndam noh pyrshah ïa ki jingkwah rhah jong kine ki nongïalam ka sorkar MDA ia ki nonghikai bad ban ailad biang ïa ki ba kin ïadon bynta laitluid biang ha ki kam politik kumba mynshwa katkum ka jing-sngew tynnad jongki la dei ban ai ka jingïaroh bad jingsngewnguh sngew burom shi katdei eh. Kito ki kynhun jong ki Nonghikai College kiba la rai kut khlem kyn-tiang dien ban ïakhun pyrshah ïa kum katei ka rai donbor bad ban beiñ ruh dei ban ai ka jingïaroh bad ka jingpyrto junom la junom. Hynrei, dang don bun bah ki jing-donkam ba dei hok ba ki nonghi-kai bym dei sorkar ki dei ban ïoh. Lada ka sorkar kam shah shkor ne leh bym suidñiew, imat, donkam shisha ia ka Kashari ba kan tuklar lem sa ïa kiwei kiwei ki Hok ba ki nonghikai ki dei ban ïoh kum ka bai nong jong ka jingshakri hok jongki ban ai jingstad ïa ki samla pule haduh ba kin da nang da stad ha ki kyrdan bapher bapher.
