Ka surok na Umshyrphi sha 7Mer, Upper Shillong ka dei kaba jur bha ka jingïakren hapoh ka ïing dorbar ba la wanrah ki MLA ka liangpyrshah bad kumjuh kiba don ha ka liang ka sorkar. Ka jingïakren ka la jur bha namar ka jingjur ka jingsahkut kali khamtam ha ka por mynstep bad kumjuh ha ka por janmiet. Kane ka surok ka dei kaba bun-kam tam namar baroh kiba wan sha Shillong, kiba leit sha Guwa-hati, bad kumjuh kiba leit na thaiñ Shillong sha Dawki, Pynur-sla, Sohra, Mawkyrwat, Mairang, Nongstoiñ bad kumjuh sha Tura ki ïaid lyngba kane ka surok. Ka dei ka surok kaba khlem sangeh shuh ka jingïaid ki kali baroh 24 kynta. Ka dei ruh ka surok kaba ju wan ïaid bha ki heh sorkar pdeng kum u President, Prime Minister ruh kumjuh namar ba ki wan dem da ka pukni nar ha ALG (advance Landing Ground) jong ki shipai suiñ ha 7Mer. Ha ka por ba wan ki heh ki haiñ, ka jingsyllang ki paidbah ka long haduh katta katta haduh ba ki hap ban ap da ki kynta ban ailad bad kane ka la pynsahkut lut ïa ki kam ki jam. Ka la don ka jingsngew shrai na ki paidbah haba ki heh sorkar kiba ñiew kum kita ki Very Important Persons (VIPs), kila wan ban tur ban tynruh rak rak wat hapdeng ka jingsahkut kali ruh namar ba ki don ka jingpah ban pyntieng ïa ki kali paidbah khnang ba kin kynriah sharud.
Toi, ka sorkar kala pyrshang ban pynheh ïa kane ka surok na ka ar tylli sha ka saw tylli ki kali ban ïaid shisien ïaid baroh ar liang hynrei ka jingpyntyllun ïa ka kam, ka long kaba suki haduh katta katta. Ka jingphet noh ka kompeni kaba shna ïa kane ka surok ruh ka dei ban don ka daw kaba hap ban wad. Ym lah ban tip la ka jingpynheh ïa kane ka surok kan lah shisha ban pyllait ïa ka jingsahkut kali ne kan nang jur kumjuh. Myn-shwa ha ka por ba dang ïaid ki trok ha Shillong bym pat don ka surok kiar (Shillong bypass) la don ka jingiakren bad khmih lynti ba kan kham kylluid ka jingsahkut kali ynda la dep ïa ka surok kiar na Umroi sha Maw-ryngkneng hynrei mynta ka la nang jur pynban ka jingsahkut kali wat la dep ïa katei ka surok ha kaba ki trok kim ïaid shuh nangne na Shillong. Ka jingsah-kut ka kali kam dei ba heh ne barit ka surok hynrei ka dei namar ba ka duna ka surok. Haduh mynta baroh ki kali kiba wan sha Meghalaya, kim don jaka ban ïaid da kawei ka lynti khlem da iaid lyngba ia ka sor Shillong. Ki don ki kali kiba thmu ban leit sha Dawki ki hap ïaid na Shillong,kiba leit sha West Khasi ki hap na Sor Shil-long, kiba wan ruh ki hap ban ïaid na Sor watla kim donkam ban ïaid hynrei tang namar ba kam don ka surok kaba pynïaid kiar. Kane ka la wanrah ïa ka jingsahkut kali, bad ka la pyn-syrwa kai ruh ïa ka por haba leit ba wan. Kumta, nalor ka jingpyn-heh ïa kane ka surok na Umshyr-pi sha Bañiun, ka sorkar ka dei ban shna ruh sa kiwei ki surok ban pyllait ïa ka sor Shillong. Ka donkam ruh ban don ka jynkieng suiñ ban pynïasoh bad pynkiar ïa kawei ka jaka sha kawei pat hynrei ka jingbteng sahkut 2 kynta tang na 7Mer sha Umshyr-pi kan ïai bteng.
