Haba ong kolshor- Lariti ka kdew bad kynthup lut ïa baroh ba kino kino ki kynhun jaitbynriew ki leh ne pdiang ha baroh lin, la ka long ka ha ka niam ka rukom, riam ka beit, ka kup ka sem, ka bam ka sa, ka riti ka dustur, ka ktien ka thylliej, ka trei ka ktah bad kumta ter ter.
Ka long ka jingshisha baroh ki jaitbynriew ha ka pyrthei ki don la ka jong ka kolshor tynrai, hynrei ha baroh katba nangïaid ki sngi ki por ka kolshor ka ju ïai kylla na ka por sha ka por bad kane ka lah ban urlong na ka jingshah tynrah ha ka synshar khaddar ne ka jinghap ban pynkylla na ka jingsuk bad ka jingdawa ka por. Ym don ba lah ruh ban im sah kumjuh baroh ruh ngi pdiang lada ka wan ka jingkylla kum ka nuksa, ngi pdiang ïa ka bam nongwei, ngi pdiang ka riam nongwei, ngi pdiang ka niam nongwei, ngi pdiang ïa ka jingshem kiwei bad kine ki hap lang noh ha ka kolshor jong ngi, bad la kynthup bad ithuh noh ïa ki kum ka kolshor jong ngi.
Hynrei ha kajuh ka por ruh ngi donkam ban tip ba ka kolshor ka trei borbah halor ka jingithuh paw ïa ka jaitbynriew watla ki don ki bynta ba ngi hap ban pdiang hynrei ka long ruh kaba donkam ba ngi hap ban kyntait, ne ki bynta ba hap ban pynjanai bad pynneh pynsah khnang ba ka jingithuh paw kan ym shah rong noh na ka jingithuh kyrpang kum ka jaitbynriew. Ha kane ka juk mynta ngi shem ba ka kolshor jong ka jaitbynriew Khasi ka la shah ktah na baroh ki liang, kam long kaba sniew ka dei ruh kaba ngi la pdiang hynrei ha kajuh ka por ka long kaba donkam ban khmih pyrman bad ki dang don ki bynta kiba ngi dang donkam ban pynneh pynsah khnang ba kan ym ktah ne poi sha u pud ba baroh ki Lariti tynrai jongngi kin duhjait noh.
Kane ka jingshah ktah ka Lariti tynrai la sakhi naduh ka niam – kaba long u klongsnam jong ka Lariti ka pyni shai ba ka la shah tuh noh khyndiat napdeng ka jaitbynriew jong ngi, kumjuh ruh halor ka riam ka beit kaba paw nyngkong shabar hakhmat ka pyrthei. Kane ruh ka dei kaba la khleh rong hapdeng kiba jied da ka riam tynrai bad napdeng jong ngi kiba bun ruh ngi la pdiang halor ka riam ka beit nongwei kaba pynsuk ïa ngi ha ka leit ka wan, kumjuh ruh halor ka bam ka sa, ym lah ban shu bam kum ha ki por ba la leit, ngi la nang ban shet kiba bunjait ki jingbam nongwei. Ha ka riti ka dustur ngi la shem ka jingkylla kaba kham kongsan ka dei ka jingpyrshang halor ka jingai jait kpa napdeng kiwei de.
Ym lah ban shu kyntait mardor namar ka jaitbynriew kaba ym bud ka jingkylla ruh ka paw kum ka jaitbynriew kaba dang sahdien hynrei hashuwa ba ka Lariti jong ngi kan jah duh noh syndon ka donkam ka jingkyndit bynriew noh bad sngap ka jingpyrta ha ka dohnud lajong aiu ngi dang lah ban leh ne aiu ba ngi dang lah ban pynsah pynneh lada dang ieid ïa la kajong ka Lariti, lehse yn ym don ba lah ban khang ïa ka mon laitluid jong ngi bad yn ym lah ruh ban kyntait kat kaba wan hakhmat jong ngi, hynrei to tip ba khyndiat ka jingpyrshang ka lah ban long ka dawbah hakhmat ka jingithuh paw jong ka pyrthei.
Ka long kaba donkam ban ri kyndong la ka jong ne kumba ju ong ‘Sarong la ka jong’ bad ‘burom jong kiwei’, . Haba ngi ong kumta donkam ban sngewthuh shai ba hapdeng ba ngi pdiang ka jingkylla ngi donkam ruh ban pynneh pynsah ïa la ka jong, ngim dei ban klet ban hikai ïa ka pateng ïa la ka jong ka Lariti bad hap ban pyndonkam teng bad pynsngewthuh ruh ka jingmut ba la bsuh ha manla ka Lariti ba ngi ïoh bad pyndonkam.
Kine baroh ki ialam sha ka thong jong ka jingieid ïa ka jaitbynriew namar kum ka jaitbynriew la ithuh nyngkong shuwa na ka kolshor jongki, lehse lada ngim shimkhia kan poi ka por ba ngi kum ki Khasi ngin duh noh la ka kolshor lajong bad ha ka jingbym salia ban kitkhlieh ïa kine baroh kan poi ka por ba ka Lariti kan ngam jyllop bad kaba sah satang ha ka nam jong ka shynrong jong ka mynnor bad kylla long ka jaitbynriew kaba ym don ka jingithuh paw ha kano kano ka liang.
