Ka lympung ïalehkai kaba heh bha ha kane ka snem ka dei ka North East Olympic Games kaba pynlong bad pdiang ka sorkar Meghalaya, ha kaba palat 3 hajar ngur ki nongïa-lehkai na 8 tylli ki jylla kane ka thaiñ shatei mihngi ka India kila wan ban ïashim bynta.
Na ka bynta kito kiba la wanrah ïa ka nam ka jingjop ia ka jylla ka dei ka burom bad ka jingai myn-siem ban bteng ban leh bha shuh bad kito ki bym lah kan pynshlur ban kham kilanmet kham jur kham eh shuh. Ngim bishni ïa kito kiba la wanrah ïa ka nam bad ki takma ïa ka ri bad ngi kitbok ruh ïa kito kiba khlem pat lah ban wanrah ïa ka burom watla ki la ïakhun satar ha kane ka lympung.
Hynrei kaei ka jingkylli hangne ka long ba haduh katno ka jingia-lehkai ka la kiew ha India bad ha kane ka jylla. Kat ka ri India kaba jingheh kaba la maïan bha nalor ka jingbun briew ruh, lada ïakheiñ ïa ka jingwanrah takma ki nongïaleh-kai kam pat ïahap satia bad kiwei ki ri kiba kham rit hynrei kiba la wanrah shibun ki takma haba ïanujor bad kiwei ki ri kiba rit. Lada ka jingai pisa ïa kiba wanrah takma kan dei ka jingpynshlur ïa ki nong-ïalehkai bad kiwei ki samla kiba dang khie, kan ym long kaba ïahap tara na ka bynta ka kam ialehkai ha ka ri bad ka jylla.
Kaba donkam hangne ka long ba ka ri bad ka jylla ka donkam ïa ka polisi kaban pyllong ïa ka jingïaleh-kai kaban khring ïa ki samla, ïa ki khynnah naduh tynrai da kaba bei bad kynshew bha ha kane ka bynta ym ban shu ïarisa ynda la wanrah ia ka takma tang uwei ne ar ngut.
Ban shu ai pisa, ban pyllong riew khraw ban pynriew spah tang ba la wanrah takma kam don jingmut than bad lada ka long ha kane ka dur, kan don ka por ba ka ri kan ïaid thylli ha kiba bun ki jingïa-lehkai.
Ka jingïalehkai ka dei kaba kongsan bha ka sobjek hynrei ka sorkar kam pat leh eiei ïa kane ha ki skul, ha ki koliej lait noh tang ka tamasa ïalehkai ban pynbang ja shisien shi snem bad kiba don ka sap ka phong kim pat lah ban pynpaw shisha ïalade sha kata ka kyrdan ba ki dei ban leh. Ki skul ki donkam ïa ka Physical Education bad ban pynrung ïa ka jingïalehkai (Sports) kum kawei na ki sobjek kaba kongsan bha hynrei kumba ka long haduh mynta ka jingpule hangne ha jylla bad ha ka ri, kam shym la long kumta bad la shu pynleit jingmut ban pule tang ban ïoh deng jingtawah ryndang (tie).
Lait na ka jingïalehkai Kriket, kiwei ki jingïalehkai ki la shah niew shadien ha India bad mynta ka jingïalehkai kynjatbol ka la sdang kiew lyngba ka jingmih ki kompeni, bad ki riew shimet ban pynlong kum ka lad ban kamai ne pliang ja katba kiwei kiwei ki jingïalehkai ki shu mih tang ha ka por ba don ka jingïalehkai Olympic bad kata ruh tang ha ki katto katne ki jaka. Ka sorkar India ne ka sorkar jylla kam don pisa kaba thikna ïa ki jingïalehkai. Lada kam don ka polisi, ka lad kan plie tang ïa kito kiba lah ban lut hi nalade ne tang ha kito ki jaka ba la don lypa ki jingdonkam katba sha kiwei ki jaka, kin shu sahkut beit kumta watla kin don kyrhai ki sap kiba kynsai.
Kaba donkam mynta ka long ba ka sorkar ka dei ban don ka polisi kaba treikam ym kaba shu shu buh kai ha almari jong ki ophis sorkar lada ka kwah ba ki samla bad ka ri kin ioh shisha ia ka lad ban sain dur ïa ka jingim jongki.
