Ka jingmih ka result MLA elekshon 2023 ka la sakhi ba ki paidbah ha Khasi-Jaiñtia ki ieid ïa ki seng riewlum watla ki ïadon bun tylli kiba mih ban ïakhun ha kane ka kynti hynrei kim pat kot shaduh 31 ngut na ka jingdon jong 36 tylli ki konstititwensi. Ka UDP ka jop 11 ngut, ka VPP ka jop 4, ka HSPDP bad PDF ki jop mar 2 ngut baroh ki don tang 19 ngut bad dang donkam sa 12 ngut ban ïoh thaw sorkar. Ngi ïohi ba ka Congress ka la hiar sha ka 4 ngut, ka NPP kam da hiar ne kiew hynrei ka neh da kaba jop 8 ngut bad kumjuh ka BJP ka neh kumjuh tang 2 ngut bad ka TMC ka la jop 5 ngut ha ka sien ïakhun elekshon namar ba ka don ki nongïaleh kiba rim. Kumba ka paw, ki paidbah ki kwah ba ki seng riewlum ki dei ban thaw sorkar hynrei ka lad kam plie satia namar ba ka HSPDP ka la leit kyrshan pynsted noh sha ka NPP bad hadien katto katne sngi, la leit bud sa ka UDP, ka PDF ruh kumjuh, katba ka VPP ka pyneh beit triang ban ym leit ïathaw sorkar lang bad ka NPP, kaba la synshar la san snem bad shah kynthoh bun ha ki kam bamsap.
Ka jingleit thaw sorkar ka UDP ban mareh pynsted bad ka NPP, ka la pynjew slew ïa ki paidbah ka ri Khasi-Jaiñtia namar ba kim kwah ba kan ïadon bynta bad ka NPP. Ha Khasi Hills, ka NPP ka la jan shah brut namar na ki 16 tylli ki konstitwensi ka jop tang 2 ngut bad bun ki MLA jongka, kiba la shah rem lut bad kiba poi sha ka kyrdan balai. Kumba haduh kine ki sngi, ki paidbah ha kiba bun ki konstitwensi kila khñium bha ïa ka UDP kum kawei na ki seng riewlum kaba heh tam ha ka jylla, namar ba kim don ka jinglong shynrang ka jingmut jingpyrkhat bad ka jingleit synrop sorkar lang jongki ha ka sien kaba ar lem bad ka NPP, kaba don lang ka BJP ka la nang pynbitar shuh ïa ki paidbah. Ha ka jingshisha, ka UDP kam dei ban shu leh khluit palat ban leit tied jingkhang ban ïathaw sorkar lang bad ka dei ban sngap ïa ka sur jong u paidbah hynrei kumba ka paw ki nongïalam ki shim ba ka dei ka jingïalehkai politik hynrei kim tip ba ka lah ban ktah ïa ka party hadien namar ba kane ka juk kam dei shuh kumba long myn-shwa, ha kaba ki paidbah ki kham stad ki kham shai bad ki kloi ban ïoh jingtip ïa kiei kiei kiba jia shano shano bad hangno hangno bad kumno ki politishian ki leh.
Ka elekshon MDC ka la don hakhmat bad kumjuh ka MP elekshon. Khlem pep, lada ka VPP ka ïeng skhem ha ka nongrim ban ym leh politik buit tuh, ka lah ban kiew bha bad jop bun ngut ha ka MDC lada ka ai tiket ïa ki briew kiba ki paidbah ki shaniah. Kumta, ka MDC elekshon kan long ka jingtynjuh ïa ka VPP ban ïoh ïa ka jingshaniah jong ki paidbah bad kumjuh ka jingtynjuh ïa ka UDP bad kiwei ki seng riewlum haduh katno ki paidbah ki stad ban ai jubab ïa ki.
