Ka MLA skhim ka dei kaba la kha ha Meghalaya ha u snem 1993 ba la thaw bad saiñdur da u Myntri Rangbah barim ka jylla bah Brington Buhai Lyngdoh (BB Lyngdoh) bam kwai ha duwar u Blei. Ym lah ban beiñ ïa ka jing-iar jabieng une u nongïalam ba ka jylla ban wanrah ia kane ka skhim ha kitei ki snem haduh baroh ka ri India kala bud bad kumjuh ka Parliament kaba wanrah da ka MP scheme.
Ha kine ki 20 tylli tam ki snem ba la pyntreikam ïa kane ka skhim, ka sorkar kala nang mang pisa khambun shuh. Myn-shwa la mang ïa ka MLA skhim tang 10 lak ha ka shi snem hynrei mynta la pynkiew ïa ka jingmang pisa haduh 2.50 klur. Ka jingmut ka MLA scheme ka long ba u MLA khamtam ki bym long myntri sorkar, ba kin lah ban ïarap ïa ki briew ka consti-tuency lajong ha ki jingdonkam ba bun jongki. Bunsien ki MLA khamtam kito kiba shong ha liangpyrshah ki shah lehbeiñ bha bad ka duna ka jingïoh skhim na ka sorkar, ym kum kito kiba don ha ka Liangsynshar.
Hynrei katba nang ïaid ka por, kala don ka jingkylla ha ka rukom pyrkhat pyrdaiñ jong ki paidbah namar ba kila kham stad kham shemphang kham-tam ka pyntreikam ha ka rukom kaba shai kdar. Kane ka jing-shemphang ki paidbah ka dei namar ba ki ïoh jinghikai na ka jingleh ki MLA, kiba pynlong bunsien ïa kane ka skhim kum ka pisa na pla lajong bad leh politik ban ai jingïarap tang ïa kito kiba kyrshan por elekshon. Kane ka jingleh kala pyntngit noh ïa ka jingmut ba synlar jong ka skhim bad kala mih ka sur mynta na ki paidbah ban dawa pyndam noh ïa kane ka skhim namar ba kala kylla long ka skhim shimet u MLA, kaba wanrah ka huri hura ha shnong ha thaw, ha ïing hasem, ha ki seng, ha ki kynhun bapher bapher.
Ha kane ka juk mynta, ki don politishian ki pyndonkam ia kane ka skhim kum ka atiar ban jop elekshon man ka san snem ban thied nongthep vote.
Namar ba ka Meghalaya ka dei ka nongthaw ïa kane ka skhim, ka la dei ïa ka sorkar jylla ba kan pynkylla noh ïa ki kyndon pyntreikam (guidelines) sha ka tarajur kaba kham noh sha ka bor jong u paidbah, ym ban ai mon ha ka kti u MLA shimet. Ïa kane ka skhim dei ban shim nongmuna na ki kyndon ka National Rural Employment Guarantee Scheme (NREGS) ne kaba ju ïa tip paidbah kum ka skhim 100 sngi. Kane ka long ban pynkup bor ha u paidbah ban rai, ban jied bad ban pyntrei-kam katkum ka jingdonkam jong ki, khnang ba ka skhim kan treikam hok bad kan ai ka jing-myntoi sha kiba dei hok, bad ki kam kiba don jingmut ban kyn-tiew ïa ka imlang sahlang. Da kaba leh kumne kan khang lad na ki riew shim kabu ba thmu ban kyllan politik ia kane ka skhim.
