Kano kano ka jaitbynriew ka don lajong ka jinglong ka jingleh kaba ïapher na kawei pat bad kane ka kynthup naduh ka ktien ka thylliej, ka trei ka ktah, ka bam ka dih, ka riam ka beit, ka pyrkhat ka pyrdaiñ, ka riti dustur, ka jingngeit, ka rukom leh rukom kam bapher bapher kiba pynïapher na kiwei pat. Ka don u pud u sam, ka jaka puta bad kiwei kiba batai bad tehsong ïa ki watla kin don sha kano kano ka jaka ruh.
Ka rukom pyrkhat pyrdaiñ ka dei kaba kongsan tam nalor ka jingieid ïa ka jaitbynriew namar kine kin pyllong ïa u briew ban sngew kum u trai jong kata ka jaitbynriew haba u don shano shano ruh kampher satia. Shi-sien ba u briew ne ka briew kim nang shuh ban kren ïa ka ktien lajong, kim kynmaw ne tip ïa ka jinglong lajong ka jaitbyn-riew, ki la long sting ha ka jinglong doh longsnam ha kata ka jaitbynriew. Kynmaw my-shwa ki mei ieid pa ieid ki ju ïathuh khana shaphang ka thma ba ïaknieh jaka kawei ka shnong bad kawei pat na bynta ba ki ïaknieh ïa u pud u sam. Kane kajuh ka nang skhem ha kane ka juk mynta hynrei ka duna ka mynsiem ieid ïa ka jait-bynriew haba ïakren ïa ka jaitbynriew Khasi.
Ha kane ka juk mynta tip namar ba la kham shai ba la kham stad, ne dei ba la synjor ka pyrkhat pyrdaiñ ba la shu kwah suk lut kwah riew spah jubor ne duna ka jinghikai naduh rympei ne, namar la ïohi ba ki Khasi kim sngewthuh bha kumno ban ieid ïa ka jaitbyn-riew. Bun kiba ai daw pynban ba kala ai jait sha ka kynthei, don kiba ai daw ba kham lah ban ïadei kam bad kiwei ki jait-bynriew, bad kumne kumtai. Haba shu peit mynta, ki Khasi ki jur ka ieid shimet suda bad ka that ka jingieid ïa ka shnong ka thaw, ïa ka kur ka jait, ïa ka thaiñ lajong namar kiba bun shisien ba la wan kiew ban sah ha Shillong, kin sa ong ba kim tip shuh ïa la ka shnong namar la sah slem sha sor watla ki dang don ki jaka puta, ki mei ieid mei pun kur jongki.
Don ruh ki bym treh kam hi tdot ba dei na kata ka shnong bad ki sngew khyllew ba dei nongsor. Haba bishar tang ïa kane ruh, la sngewthuh ba ka jingieid jait-bynriew jong ki Khasi ka la hiar bad ka la synjor bha. Don lei ka jingïakynnoh kynshi kyneh tang para Khasi, u war u kynshi ïa u maram, u pnar u kynthah ïa u lyngngam bad kumta ter ter. Kum kane ka rukom pyrkhat kam lah ban tei bad ban pyllong kawei ia ka jaitbynriew nalor ba ka dei kaba rit paid.
Ban pynrung ïa ka mynsiem ieid jaitbynriew ieid ri, ban tip ïa ka histori jong ka jaitbyn-riew, ki riew ïaleh, ka Lariti, ka deity, ki jingleh jingkam, ka don-kam ban pynrung ïa ka jinghikai ha ki lynnong kot shaphang ka jingieid ïa ka jaitbynriew.
