Ka rep ka riang ka dei ka jingtrei kaba kongsan tam napdeng baroh ki jait jingtrei ha kane ka jylla Meghalaya ha kaba palat 70 haduh 80 percent ki nongshong shnong ha ka jylla ki don ha jaka nongkyndong bad kiba trei ba ktah kiba ïadei beit sak bad ka rep ka riang. Ha ka kam rep, ym donkam uba nang uba stad hynrei donkam uba nang ban pynkih kti pynkhih kjat, uba nang ban rep ñiut, ban thung ban tep, uba nang ban kheiñ ïa ka sngi u bnai, ïa ki saw aïom, ka por thung por ot bad kumta ter ter. Ka rep ka riang ka dei ka lad kaba pyn-biang ïa ki jingdonkam ba man ka sngi jong ki nongkyndong namar ba watla, kim don jaka rep, hynrei ha ki shnong jongki, kila ïoh ban leit bylla ban ïoh ka bam ka sa.
Sngewsih ba ha kine ki sngi, katba ka juk stad ka la nang roi, katba kiwei ki ri kila nang kiew ban kyntiew ïa ka rep ka riang da kaba wanrah ïa ka buit stad thymmai, ki tiar ki tar hynrei ha kane ka jylla pat ka la nang hiar pynban ka rep ka riang. U sohñiamtra, ka kait, sohmrit, kwai, tympew, sohphan, sohkymphor, sohtrun bad kiwei kiwei ki jait soh jait jingthung ba bun jait, kila nang troiñ pynban ha kane ka jylla, khamtam ha ka thaiñ riwar kaba ju ñiew kum kawei ka Eden jong ka ri Khasi-Jaiñtia ha ki por mynnor. Mynshwa ka jingpyn-mih sohñiamtra ka thain riwar ka la kot sha ki spah trok ha ka shi samoi, bad la ju shalan sha Bangla-desh lyngba ka khappud na Dawki hynrei mynta wat tang ban wan die hi ha ki ïew shnong, ne sha Shillong ruh la kham jynjar namar bym ïoh soh shuh. Ki diengsoh, ki la bam khñiang, kila troiñ lut. Ki jhur, ki phan, ki sohlah, ki sohbaingon, ki presbin bad kiwei kim mih bha shuh bad ki nongrep kila shem shi-tom ban pyndap ïa ki jingdonkam jongki bad ka la pyllong ia ki ban sakma ban leit jingtrei jingktah noh shawei namar ban pynbiang ïa ka jingdawa bam ka kpoh.
Ha ka jingshisha ka tnad ka rep ka riang ka jylla ka dei ka tnad kaba peit kyrpang ia ka rep ka riang, ïa ki nongrep hynrei kam long kumta, bad kumba ka paw ka tnad rep ha kane ka jylla kam pat don kano kano ka lad kaba phai khmat sha ki nongrep ha ka rukom kaba ïar, bad kaba heh ban pyllong ïa ka kam rep kum kawei na ki jait kam kaba khraw ban ïa kiwei pat. Mynshwa ki nongrep ki rep da ka sboh mariang bad ki jingthung jing-tep ruh ki roi ki san bha katba ha kane ka juk mynta, la pyndonkam da kita ki buit stad ba laiphew jait naduh ka jingpyndonkam da ka dawai sboh, ki symbai ba la jied bha ba la wanrah nabar, bad kiwei kiwei ki jait jingthung kiba kynsai ba la wanrah ka sorkar hynrei ynda la thung sha kane ka jaka, ki long pynban ka jingtim ïa ki nongrep. Kane ka jingsniew ka rep ka riang, ym lah ban len bad dei ban kdew kti ïa ka tnad ka rep ka riang kaba shu kwah ban wanrah da ki symbai ba nabar ban pynsniew ïa ki symbai kiba don lypa na kane ka jaka. Ka tnad ka rep ka riang ka dei ban wad ki lad ki lynti kiba thymmai ban kyntiew ia ki nongrep, ia ka rep ka riang, da ki jait jingthung kiba la don lypa na kane ka jaka, ym ban wanrah kynsha kiba nabar kiba la pyntroiñ ïa kiwei ki jingthung kiba la mih na kane ka jaka bad kumjuh ïa ka khyndew.
Ka tnad ka rep ka riang kaba don lut ki stad ki jhad ha kane ka liang, kam dei ban shu ai skhim, ban ai subsidy, ban ai kali ïa ki nongrep ne ki kynhun, hynrei ka dei ban leh ïa ka jingwad bniah sha ki lyngkha ki risa jong ki nongrep, ban leh ka jingwad bniah ïa ka khyndew, bad ban pynbha ïa ki jaka rep, khnang ba kin lah ban kyntiew shisha ïa ka kam. Ka jingai skhim na ophis ka tnad ka rep ka riang kam don jingmut eiei ruh.
