Ïa ka seng Kut Snem ne Snem Ba Suit ba Shor ïa ka seng Khasi ban pynneh pynsah, ban ïada bad ban kyntiew ia ka jinglong tynrai, la seng ha u snem 1899 ha ka 23 tarik Naiwieng. Ka Seng Khasi ka la ju rakhe ïa kane ka sngi kum ka Seng Kut Snem ne ha ka ktien phareng ki ong ka Foundation Day. Ka la ïaid mynta sha ka 123 snem naduh ba la seng ïa ka, ban teh-lakam ïa ka jingshah ïalam bakla jong ki khun Khasi ha ka jingngeit jong kiwei, lyngba ka bor jong ki briew kiba wan nabar ri, ne ki Missionary ka balang Khristan.
Ha ki phew snem ba la leit noh, ka la don ka jingrit myn-siem ka jingsngew tlot ka jing-sngew syier bad ka jingshep-tieng jong kiba dang bat dang ksoh ïa ka niam tynrai namar ba ka jingkhlaiñ bor jong kiwei ban pynkylla ïa ki paidbah ka ri Khasi sha kawei ka rukom ngeit niam khamtam ha kane ka jylla kumba 70 percenr ki dei ki briew kiba la kylla sha ka jingngeit ka balang Khristan.
Ha ka por mynshwa, ka jingtreikam ka Seng Khasi kam pyiar hynrei ka shu sahkut ha ki katto katne ki bynta jong ka ri Khasi-Jaintia watla ki khlaiñ ha la ki rympei ïing jongki hapdeng ki jingshah tynjuh kiba har rukom ban kdat noh ïa ka jingngeit lajong jongki. Ka la don ruh ka jingshah kren kynshi kyneh ha kiba bun ki rukom ha ki por mynshwa haba ki nongïalap na kiwei ki jing-ngeit ki leit sha ki shnong ki thaw ha ki jaka nongkyndong bad namar ka jinglong sahdien ha ka pule ka puthi, ka jingnang jingtip, bun kiba la ngop noh watla ki don kiba leit pynïasoh hi namar kino kino ma ki daw.
Ka jingseng ïa ka Seng Khasi 123 snem mynshwa, ka la ïarap shibun ha kane ka juk mynta ban kyndit ban pyrkhat ïa kiba dang bat ha ka niam tynrai na bynta ka lawei. Ka jingïakhih jong kiba don ha ka tynrai ban pynkhie im ha kane rilum ka la sdang ha ki snem 80 eiei hadien ba ki la don kiba la kham nang kham stad ha ka pule puthi, bad ha ka jingshemphang bad ka jingiohi jngai.
Kane ka la ïalam sha ka jingseng ïa ka Seng Khih-lang, bad kumjuh ka jingthaw ïa ki tnat jong ka Seng Khasi ha ki byntam ka lum Khasi bad ka Sein Raj ha bynta ka lum Jaintia khnang ban ïada na kano kano ka jingshah ïalam bakla ïa ka jingngeit ha kiwei pat ki jait jingngeit. Ka jingdon ki tnat ha ki shnong ki thaw, ki jaka ki thaiñ ka la ïarap shibun ban pyn-sngewthuh ban pynshai ïa kito kiba don ha ka jingngeit tynrai bad wat ïa kiba don sha kiwei ki rukom ngeit ban ym shah ïalam bakla ne ban shah kren kynthah ha kiwei hynrei ban pyni lem ba kano kano ka niam ka don la kajong ka dor bad kam dei ban beiñ ne ibeiñ ïa kiwei pat ki jait niam ne ki rukom ngeit
