Ha kane ka kynti ba mynta, ka dei ka social media kaba pynphriang sted bha ïa ki khubor ha man la ki minit ha uwei pa uwei u briew. Ka dei shisha ka juk jong ka social media namar ka la synshar ïa man la uwei pa uwei u briew. Hynrei, ka jingkylli kaba mih kalong, haduh katno kane ka juk jong ka social media kan ktah shisha ïa kane ka MLA Elekshon 2023 kaban sa long shen ha ka 27th u Rymphang 2023.
Ka bynta bad ka jingktah jong ki social media ka treikam bha ha kito ki ri kiba la shai bad kumjuh ruh ha kito ki briew kiba la nang la stad bad kiba la shai ka jingmut jingpyrkhat. Ha ki briew kiba dang dum ka jabieng bad dang duna ka bor pyrkhat pyrdain jongki,ka social media ka kylla long tang ka kamkai bad kam pynbyrngia ïa ki. Kiba dang tlot ka rukom pyrkhat,ka pisa,ki tiar ki tar ïoh ei,ki ktien pynbiej laiphew jait kin dang shah pynngop hi ha ki briew u candidate khamtam ki nongtrei ba napoh jongu. Kum kine ki briew ym don dawai ban pynkoit ïa ka jingshah teh mraw jongki ha ki kheiñ Blei ïa u candidate jong ki bad ka party ba ki la ngat.
Mynta ka sien, ngin ïohi shisha haduh katno ki briew kin stad shisha ban jied bad pynkylla khongpong ïa ka synshar khadar hapoh ka jylla jongngi. Ngi la ïohi lyngba ki social media ba ki Minister jong kane ka sorkar MDA kaba bat ïa ka jingsynshar ha kine ki san snem ba lah dep ki ïai kop bad kyrhuh ba kin jop suk biang ïa kane ka elekshon 2023 da kaba suk eh hynrei ki social media pat bun kim pdiang shuh ïa ka rukom treikam jong kane ka sorkar MDA.Kiba bun ki paidbah bym don liang satia sha kano kano ka party ki kwah noh ka jingkylla kaba thymmai. Kim kwah shuh ba kijuh shi kijuh ki briew kin synshar da kijuh shi kijuh ki rukom treikam da ki phew phew snem mynta. Lada kane ka dei ka jingkwah bad angnud shisha ki paidbah nongshong shnong kumba ka paw ha ki social media, ka jylla jongngi khlem artatien kan wan shisha ka jingkylla da ka rukom treikam kaba thymmai da ki riew thymmai shisha. Ka result MLA elekshon ruh kan kylla khongpong shisha khlem poi pyrkhat hadien ka 2 tarik Lber 2023 kaba dei ka sngi niew vote ha ka jylla jong ngi.
Hadien ka 2 tarik u Lber 2023, lah ban bishar bad ïohi shisha ïa ka jingstad, ka jingshemphang bad kumjuh ruh ïa ka jinngbiej bad jingtlot ki paidbah. Kin don ki constituency kiba la kheiñ bad niew ïa ki kum kiba la shai hynrei kin sa pyni pat da ki kam ba ki dang biej bad dang sahdien ha ka jingmut jingpyrkhat jong ki. Don pat ki contituency kiba la kheiñ biej bad kheiñ troiñ hynrei kin sa pyni pat ba kin long pynban kiba la shai bad lah ïaid shakhmat ha ka rukom pyrkhat pyrdain jongki. Lah ruh ban bishar, hato, stad u nongsor ne stad u nongkyndong ban jied ïa la ki nongmihkhmat paidbah. Haduh katno ki nong Mawlai kin pyni bad pynshisha ba kidei ki nong Mawlai ba shisha. Ki nong Mawkhar, Jaïaw pat, ki lah ne em ban pynshisha ba ki dei shisha ka jabieng jong ka ri ‘Khasi-Jaiñtia’ kumba ki ju sin mynshwa.
