Kane ka Tamasa pynlamwir ïa ki paidbah ka la wan biang mynta u bnai Rymphang 2023 bad kane ka jadu pynbiej ïa ka jingmut jingpyrkhat jong ki paidbah kan ïai bteng haduh kumba ar taïew tam ei ei naduh mynta ka taïew. Ha kane ka tamasa shongshit paidbah, bun ki paidbah naduh ki samla ki samhoi, shynrang bad kynthei, ki riew rangbah bad longkmie ruh kumjuh ha ki kyrdan bapher bapher kim kheiñ ne kim salia shuh ïa ka sngi ka miet, kim salia shuh ïa ka duh thiah ka duh dem bad khlem tyngkai shuh ruh ïa ka por bad ka bor jongki ban pynlut kai bad pynleit jingmut beit triang tang shaphang uta u kandidet bad ka party jongki. Ka dei ruh ka por ïa peit matdong briew, ka por ba ïa bishni pihuiñ para shnong para thaw, bad ka por wat ban ïa phoi bad ïa pait ïapra wat shi ïing shi sem ruh kumjuh. Ngi ïohi ba, man ka por ba, katba dang jngai ka Tamasa shongshit paidbah, bun ki briew ki iakren tip briew tip Blei suda. Bun ruh ki la ïa pynpaw ba ki la ngiah bad kdang hi shoiñ ïa kane ka Tamsa hynrei mynta pat, mar ïa poi kane ka tamasa, kine hi kijuh ki briew kiba leh shongshit khleh biej eh hakhmat hakhmat ryngkat bad u kandidet jongki. Don bun bah ki daw balei tang shu poi kane ka Tamasa pynshongshit paidbah ki briew ki ïa leit noh ïap kumba shoh jadu ka myntor. Dei ha kum kane ka por ba ka khawai ka dawai ka pahuh kyrhai na u kandidiet bad ka party jong u. Ka dei ruh ka aïom kaba u kandidet u dang don ka mynsiem ieit, burom bad pynsngew jan ïa ki paibah.Ka dei ruh ka aïom ban ïoh leh ba heh, shong kali ei bad jied da kino kino ki kali rem dor katba mon. Ka dei ruh ka aiom ba ki kandidiet bad ka party jong ki ki ïohlad bad shim kabu ban pynkiew skong ïa u paidbah nongkyrshan jong ki khamtam ïa u duk u suk bad u luk u lak uba kham shitom ban ïoh leh ba heh ba haiñ kum kiba ïoh kabu kiba ïoh ba kot.
Hynrei, mar ïa dep thep vote pat, kynjah hi jar ka jingshongshit ki paibah. Ki kandidiet kin leit rieh noh sha ïing paki dulan jong ki. Ki paidbah bapli kin shem shitom ban wad bad ïakynduh ïa ki. Kiba rem lei ki jah syndon noh jar bad kiba jop pat kin ïaleh bad ïa rai katba mon ne sngewbit ma ki. Lada ki paidbah nongpynjop jong ki ki isih bad shun ïa ka party BJP, ki MLA ba la pynjop jongki pat kin leit ïa snoh khnang shata. Lada ki paidbah kim mon ne sngewtynnad ïa ka party NPP ba ki ong hana, long kumba leit ai doh lypa ia u Garo ne ka AITC ba ki ong ka party Bengali na Kolkata, ki MLA ba kin sa pynjop pat kin leit noh ïap sia sia shata kumba noh ïap u dkhiew ha ka thit. Peitkai keiñ, mar ïa jop, khlem artatien ki MLA bad ka party ba ki jop kim nym kheiñ briew shuh ne kim salia shuh ïa ki paidbah nongkyrshan lajong hynrei khlem artatien kin pyngngeit bad pynksan ïa ki paidbah nongkyrshan ba kin leit ïa snoh rdin kat sha ka party ba ïoh thaw sorkar. Ki paidbah bapli ki kylla long tang kum u brut,Ynda la dep pyndonkam ïa u, ki bret noh sha rud bad sha nala khlem salia shuh.
Mynta, ba dang ïoh pisa bher bher, man u briew u lok suda hynrei ynda la kyrduh pat, wat tang ha tyngkong ïing ruh kim shlan ban wan mih. Ki paidbah ki dei ban da khan da pyrkhat bha, ki dei ban da puson janai bha ha kum kane ka por shongshit ïoh ki babe dier por kylla tang shu mar ïa dep ka tamasa pynshongshit paidbah.
