Ka jingïabeiñ ïakhoh, ka jingïakawang nadiang na mon, bad phalup pathar ki nongïalam jong ki seng saiñ pyrthei ha ka por elekshon ka long kaba jubor haduh katta katta. Mynta ka kynti, ka thma ktien kam kut tang ki parti kiba don ha ka liangpyrshah hynrei wat kiba ïadon lang ha ka sorkar ruh ki ïakawang para maki. Ka thma ktien ka kham jur hapdeng ka liangpyrshah jong ka ïingdorbar thawaiñ ka jylla, ka All India Trinamool Congress (AITC) bad ka sorkar Meghalaya Democratic Alliance (MDA) ka lah nang jrong katba nang mih ki sngi katba nang jan ka elekshon. La ïohi ba u nongaiktien jong ka AITC, u Saket Gokhale u la bteng ban ther pyrshah ïa ka sorkar MDA, ba la ïalam u myntri rangbah ka jylla u Conrad Sangma.
Ha ki khyndiat sngi kiba la dep, u Gokhale u la kam ba u la lap ïa ka jingshisha lyngba ka aiñ RTI, ba ka seng National People’s Party (NPP) kaba ïalam ïa ka sorkar MDA ka la pynkheiñ ïa ka aiñ jong ka Supreme Court namar ka khlem ai jingkheiñ ïa ki jingpynlut jong ka, kiba ka la pynlut na ka bynta ka elekshon MLA ha u snem 2018. Hynrei u James Sangma uba dei u National Secretary jong ka NPP, u la jubab ba u Gokhale u dei ban da khreh kot lypa ha ïing, ha shuwa ba un ang ka shyntur bad kdew kti ïa kiwei.
Kumba ju long, ka jingïather ïakhyrwit ki seng saiñ pyrthei shwa ka shwa ka elekshon khamtam ba ka la jan, ka ju jia beit namar ba ka dei ka samoi ban pynking ban pynksan nia hakhmat ki paidbah ba kin ngeit ban ai ïa ka jingkyrshan ïa ki. Ym tang ki seng sain pyrthei kiba ïaktaid nia, hynrei ka rynsan elekshon kaba kham shongshit shisha ka dei ha ki shnong ki thaw, ki ïew ki hat hynrei haduh dpei syndon, ha kaba uwei la uwei pat, kawei ïa kawei pat kila ïapynksan nia ïa la ujong u kyrtong, la kajong ka party ba ki kyrshan bad kumta ter ter. Na ka daw ka elekshon ka la poi u pud ruh ban ïaphoi ban ïadom sah, ka wanrah ruh ka jingsngewpher niam, sngewpher seng, sngewpher kur, sngewpher ïing, bad ka pynpait pynpra ïa ka shnong ka thaw, bad kane ka la ktah bad pyndkoh ruh ïa ki kam pynroi ha ki shnong ki thaw bad ïa kiba dei hok ban ïoh skhim ruh kila kylla langknia lut ha ka bor pynbuaid ka politik.
Hynrei kaba kham shutia ka long ba katba ki paidbah nongjied ki ïadom kumban ïalympat, ïakyndong kti, ki MLA pat ynda kila jop, kila ïashong lang bad kiwei pat ki MLA na kiwei ki party ban ïathaw sorkar, ban ïasam projek lang bad ki ieh ïa ki paidbah sha madan tang ban bit ban biang ïalade. Kito ki nongkyrshan kiba jop u kyrtong, ki kmen bym lah ban ong shuh namar ba ki ïoh mon katba kito kiba shah rem u kyrtong ki la kylla long tang ki nongshun ba khraw, kin ym ïoh eiei shuh na u MLA wat lada ka party kaba ki kyrshan ruh ka don lang ban ïathaw sorkar. Ka jingïatreilang ki MLA jong ki seng saiñ pyrthei ban ïathaw sorkar, ka la pynkmen tang ïa ki MLA katba ki nongkyrshan jong ki party ha ki konstitwensi kiba shah rem ki la shah ñiewbein sharud ha ka kynhun jong u MLA ba jop uba don ha ka liangsynshar, bad ki kam ki jam ha Block la leh baheh bad pynïaid tang ki briew u MLA ba don ha ka sorkar, ban jied ban ai skhim khamtam ki skhim ka sorkar jylla kiba lah ban leh katba mon.
Kane ka jingleh ki nongsynshar, ki briew kiba don ha ka sorkar, ki MLA, ki myntri sorkar, ka la pynrandien ïa ka roi ka san ha ka jylla, bad ka paw ba ki pyrkhat tang ïa ki nongkyrshan ka konstitwensi jong ki ym ia ka jylla ne ka ri.
