Ka jingjied ïa u nongmihkhmat sha ka ïing Dorbar Thaw Aiñ ka Meghalaya na ka bynta ka Sohiong Assembly Constituency, East Khasi Hills District kan long ha ka 10 tarik u Jymmang, 2023 bad ka jingñiew bad ka jingpynbna ïa ka result kan long ha ka 13 tarik u Jymmang, 2023. Ka Sohiong ka dei kawei na ki sanphew san tylli ki Assembly Constituency kiba la mang kyrpang na ka bynta ki riew lum ka Meghalaya ha ka ïing Dorbar Thaw Aiñ jong ka Meghalaya kaba don hynriewphew ngut ki nongmihkhmat. Ka jingjied ïa u nongmihkhmat jong ka Sohiong Assembly Constituency la pynsangeh shuwa ban pynlong ïa ka jingjied ïa ki nongmih khmat sha ka ïing Dorbar Thaw Aiñ jong ka Meghalaya. Kane ka jingpynsangeh noh ïa ka jingjied ïa u nongmihkhmat jong ka Sohiong Assembly Constituency, ka long na ka daw jong ka jingkhlad noh jong uwei na ki kyrtong jong ka Sohiong, u Bah H.D.R. Lyngdoh, uba long u kyrtong jong ka United Democratic Party. Ka jingïakhun kan long hapdeng u kyrtong ka UDP u Bah Synshar Kupar Roy Lyngdoh Thabah, u Myntri Bamynshuwa jong ka Meghalaya, u Bah Samlin Malngiang u kyrtong jong ka seng saiñ hima sima National People’s Party, u Bah S. Osborne Kharjana u kyrtong jong ka seng Congress, u Bah Sandondor Ryntathiang u kyrtong jong ka HSPDP, u Bah Seraph Eric Kharbuki jong ka Bharatiya Janata Party bad bah Stodingstar Thabah. Hynrei, ïa ka bok ka kupar jong kine ki nongmihkhmat kan shong ha ki nong vote jong ka Sohiong Assembly Constituency kiba haduh 34,783 ngut. Kawei ka vote ka long kaba donkam haduh katta katta ban rai ïa ka jingjop jong u kyrtong. Kawei ka vote ka lah ban rai ïa ka jingïoh ïa u nongmihkhmat uba lah shisha ban ai ïa ka jingshakri kaba bha tam na ka bynta jong ki paidbah. Ki nongthep vote ki dei ban sngewthuh ba ka vote jong ki ka long kaba kordor haduh katta katta. Ka jingpynjop lane ka jingpynrem ïa u kyrtong babha ka shong ha ki. Kane ka dei katta kaba ngi ong ka bor jong ka jingsynshar paidbah. Ha ka synshar paidbah la khmih lynti ba baroh ki dei ban leit thep vote ban jied ïa ki nongmihkhmat. Ka riti synshar jong ka ri India ka kdew shai ba ka jingleit thep vote ka dei ka hok jong ki nongshong shnong jong ka ri India.
Hynrei, kaei kaba ngi shem pat ka long ba ka jingwan thep vote kam ju long shispah na ka shispah. Haba shu kheiñ kyllum na ka jingpynlong ia ki jingjied nongmih khmat ba la dep, ka jingwan jong ki nongthep vote kan long tang kumba phraphew na ka shispah. Mano keiñ kine kiba jah. Kine ki bajah, ki dei kito kiba ym sngewdonkam ban leit thep vote. Kine ki bym leit thep vote ki dei kito kiba ong ba kam lei lei lada kim leit thep vote nambar ba kawei ka vote kam lah ban thaw pyrthei. Hynrei, lada bun kiba kum kita, ka pynpoi sha kito ki arphew na ka shispah ki bym wan thep vote. Kine ki arphew na ka shispah ki long kiba kongsan ban rai ïa ka jingïoh ïa u nongmihkhmat uba la ha kit ïa ka ri, ka jaitbynriew bad ïa ka jylla hi baroh kawei. Te, namarkata, ym dei ban jah ban jied ïa u nongmihkhmat jong ngi.
Ha ka jingjied ïa ki nongmihkhmat ha ri India, ka jingsngew niam, ka jingpyndonkam ïa ka pisa, ka jingleh donbor, ka ieid party bad ka jingsngew jaitbynriew kiba long kiba trei borbah. Hynrei, kawei kaba ngi dei ban sngewthuh ka long, ba ngi ka long ba ngi jied ïa u nongmihkhmat u ban long u nongthaw ïa ki aiñ kiba lah ban ïada ïa ngi na ka jingshah tyllep noh ha kiwei. Lada ngim pynjop ïa kiba theh pisa ha ka por elekshon, ma ki ruh kin shu jah la ka jah. Kawei kaba dei ban rung ha ka jingmut jingpyrkhat jong ngi, ka long ba kawei ka vote kam iaryngkat bad ka lut sanspah ne lut arhajar. Ka vote jong ngi ka ïaryngkat bad ka jingdon pisa jong ka Reserve Bank of India. Lada ngi skhem haduh katta katta, ym ym don ba lah ban thied ïa ka vote jong phi jong nga.
