Sa lai bnai ba ka jylla Meghalaya kan sa leit sha ka jingjied ïa ki nongthaw aiñ (MLA) ba thymmai, ki seng saiñ pyrthei bapher bapher kila ïakhih ïaksaid khohreh sharum sha-neng, ban khwai ïa ki briew kiba kham biang kiba kham paw ban ïamih madan ha ka elekshon. Hynrei kaba kham jur bha ka dei ka jingïakhih ban ïatan ïa ki MLA na kiwei kiwei ki seng saiñ pyr-thei khamtam ki party kiba don ha ka liangsynshar ha kane ka sorkar MDA kaba ïalam ka NPP ha ka jylla lait noh ka seng Cong-ress kaba don ha ka liangpyr-shah kaba la ïakynduh ïa ka apot sniew ha kaba baroh ki MLA jongka, kila phet krad lut.
Ha kane ka samoi jinglong MLA, ka Congress ka dei kaba sniew bok tam namar ba ha ka elekshon ha u 2018, ka la jop 21 ngut hynrei ka la sah jiro mynta khlem pat kut ka samoi san snem ruh. U President ka MPCC u bah Vincent H Pala, u la sniew bok bad ïakynduh ïa ka jingtyn-juh kaba shyrkhei bha namar ba tang shu shimti ma u, kum u President 12 ngut ki MLA kila phet noh sha ka TMC katba sa san ngut ki la ïaleh pyrshah ïaka party ban leit kyrshan ïa ka sorkar MDA kaba ïalam ka NPP ha kaba ka BJP ruh ka don lang. Kane ka jingleh ki san ngut ki MLA ka la pyllong ïa ka Congress ban sospen hynrei mynta ka la poi syndon shaduh ba kim shym la treh shuh ban leit phai biang sha ka seng. Bun na kine ki MLA mynta, kiba la thmu bad pyn-khreh ban leit noh sha kiwei ki party kum sha ka UDP, NPP bad BJP.
Hynrei ha kane ka samoi, ym tang ka Congress kaba ïakynduh ïa kane ka apot, hynrei ka NPP ruh ka la ïakynduh ïa ka jingeh hadien ba ki 2 ngut ki MLA ki la phet sha ka BJP katba uwei u lah ban leit sha ka TMC. Ka TMC ruh ka la ïakynduh noh hadien katto katne bnai hadien ba kumba uwei u MLA u la mih noh ban leit sha ka BJP bad sa uwei un sa mih biang ban leit sha ka UDP. Hynrei mynta wat ka UDP ruh ka la shah pynwit ha kaba uwei u MLA ba pynïasoh un mih noh ban leit sha ka BJP. Ka PDF ruh kaba don saw ngut ki MLA, mar shiteng ki la pynkhreh ban mih noh ban leit sha ka NPP bad kumjuh ka HSPDP kaba don 2 ngut ki MLA, baroh kila pynkhreh ban mih noh ban leit sha kiwei ki party ban ïakhun ha kane ka elekshon MLA ban wan.
Na ki dak ki shin, ka party kaba kham ïohnong tam ka dei ka BJP namar ba ka don tang 2 ngut ki MLA hynrei haduh mynta kiba la pynthikna ban leit rung sha ka BJP ki la don 4 ngut. Ka jingleit rung BJP u bah Himalaya M Shangpliang u MLA na Maw-synram kan long ka jingkyrkhu ïa ka BJP ha Meghalaya kumba ngat u khaheh hynrei ka jingkylli ka long haduh katno ki paidbah kin pdiang ïa ka BJP ha kane ka jylla hadien ba la jur ka jingisih na ki Khristan. Lada u Bah Shangpliang bad kiwei ki kyr-tong na ki jaka nongkyndong kin jop ha kane ka kynti na ka BJP, kata ka mut ba ki paidbah ki pdiang ïa ka BJP.
