Ïa ki jylla ha dong mihngi la thaw katkum ka North Eastern Areas (Reorganisation) Act 1971 bad ka jylla Meghalaya la thaw da kaba kynthup ïa ki 3 tylli ki District Council, cantonment bad municipality. Ka Part XXI ka riti synshar ka ri kam shym la kynthup ne kdew eiei ka kyndon kyrpang ha kaba ïadei bad ka jingthaw ïa ka jylla Meghalaya kumba long kiwei pat ki jylla ha kane ka dong mihngi. Mynta ki don 3 tylli ki District Council ha Meghalaya ba kynthup ïa ka Khasi Hills Autonomous District Council, Jaiñtia Hills Autonomous District Council bad ka Garo Hills Autonomous District Council.
Kumba long mynta, ki district council ki la hiar dor palat namar ba kim don bor eiei ruh hakhmat ka sorkar jylla. Ka ktien autonomous kam don jingmut namar ba kam don kawei ruh ba ki district council ki long autonomous ne ka bor laitluid. Ka jylla Meghalaya kam dei ka jylla ri thor hynrei ka jylla rilum ne Hill State hynrei ha ka jingthoh pat kam dei ban ong ka jylla rilum bad lah ban ong ba ka dei ka jylla kyllum bad dei na kane ka daw, ba dang donkam ïa ki district council. Toi, ha ka jingshisha, ka sorkar jylla ka dei ïa ki riewlum bad ki district council ruh ka dei ïa ki riewlum Khasi, Jaiñtia bad Garo.
Kiwei ki jaitbynriew ne ki jylla kum ka Mizoram, ka Nagaland, Manipur kim donkam District Council shuh namar ba kila ïoh ïa la ka jylla lajong jong ki bad kiba don ki district council ha kitei ki jylla, ki dei tang ïa ki jaitbynriew bynriew riewlum rit paid. Hynrei ha kane ka jylla Meghalaya, naduh ka jylla haduh ki district council la jied ïa ki nongmihkhmat da ki riewlum heh paid (Khasi, Jaiñtia bad Garo) bad la synshar ruh da ki riewlum Khasi, Jaiñtia bad Garo hynrei balei pat ki mat kiba bun ki nang jyrwat haba synshar bad bat ïa u lakam da kijuh ki briew bad la jied ruh da kijuh ki briew.
Ki don ki briew ha ka imlang sahlang kiba don ka jingpyrkhat ba la donkam ban pynduh noh ia ki district council namar ba kam don jingmut shisien ba la ïoh ïa ka jylla hynrei ki don kiba pyrshah ba ki district council ki donkam ban ïeng kum ki nongmuna ban peit ïa ka khyndew ka shyiap, ka riti dustur bad kiwei ki rukom leh rukom kam jong ka jaitbynriew. Hynrei lada kren ïa ka jingshisha, ki district council kim treikam bad kim lah ban peit ïa ka khyndew ka shyiap, ïa ka riti dustur bad kane ka paw ba bun ki aiñ (Bill) ba la shna bad thaw ki district ki la shu kylla bijai bad sop bthuh ha almari ha Secretariat ne ha Raj Bhavan jong u Lat ka jylla. Ka la mih ka jingkylli, lada ka sorkar jylla ka dei ïa ki riewlum, bad ka district council ruh ki dei na bynta ki riewlum, balei pat nang jyrwit nang jyrwat bad nang syllang ka jingïadei kam. Ka sorkar jylla ka lah ban shu pynshad shrieh ïa ki district council bad ka lah ruh ban ksih lada ka mon.
