Ka 10 tarik u Jymmang, 2023 kan sa long sa kawei pat ka sngi ka ban sah kynmaw pateng pakit ha ka history jong ka Sohïong Assembly Konstitwensi kaba don ha East Khasi Hills District. Kane ka long ba mynta ka sngi, ki nongshong shnong jong kane ka Konstitwensi ki ïa jied ïa u nongmihkhmat sha ka ïing Dorbar Thaw Aiñ ka Meghalaya na ka bynta ka Sohïong Konstitwensi . Kane ka dei ka sngi ha kaba ki nongthep vote kynthei bad shynrang ki ai ïa ka rai jong ki ha kaba jied ïa la u jong u nongmihkhmat. Ka jingjied ïa u nongmihkhmat jong ka Sohïong Konstitwensi ka la dei ban long ha ka 27 tarik u Rymphang mynta ka snem, hynrei ka Election Commission jong ka ri India ka la pynkynriah noh ïa kane ka elekshon mynta ka sngi.
Kane ka dei na ka daw jong ka jingkhlad noh kyndit kynsan jong u Bah H. Donkupar Roy Lyngdoh uba long u Myntri barim jong ka Sorkar Jylla bad u kyrtong jong ka United Democratic Party na Sohïong Konstitwensi u la khlad noh ha Bethany Hospital, Shillong ha ka 20 tarik u Rymphang, 2023. Ki kyrtong ki ban ïaknieh ban long kum u nongmihkhmat kane ka thaiñ ki kynthup ïa u bah Samlim Malngiang, u MLA barim, U bah Synshar Lyngdoh Thabah, u ban mih aireng na ka United Democratic Party (UDP), u bah Osborn Kharjana u ban mih aireng na ka na ka Congress (INC), u bah Sandondor Ryn tathiang u ban mih na ka Hills State People Democratic Party (HSPDP), u bah Stodingstar Thabah u ban mih na ka Trinamool Congress (TMC) bad u bah Seraph Eric Kharbuki na ka Bharatiya Janata Party (BJP). Ki jingpynkhreh pynkhrum na ka bynta jong kane ka elekshon ki long kiba la biang nadong shadong. Nalor ki pulit jong ka Meghalaya, ka Sorkar Pdeng ka la phah ruh ïa ki pyrton shipai jong ka ban pynthikna ba kane ka elekshon na ka bynta ka Sohïong Assembly Konstitwensi kan long kaba ïaid beit ïaid ryntih, ba ka long kaba lait na ka jingpynthud pynwit, kaba shngaiñ ha kaba ki nongthep kin ai ïa ka rai jong ki da la ka mon laitluid khem kano kano ka jingpynbor jongno jongno.
Ka ri India bad ka jylla Meghalaya ki long kiba donbok ba ka jingjied ïa ki nongmihkhmat jong ngi, la ka long na ka bynta ki dkhot jong ka ïing Dorbar Thaw Aiñ Parliament lane na ka bynta jong ki ïing Dorbar Thaw Aiñ State Assembly ka long da ka jingjied jong u paid. Ka Riti Synshar jong ka ri India ka kdew shai ha kawei na ki bynta jong ka baki nongshong shnong jong ka ri India ki don ïa ki hok tynrai ba kiwei kim lah ban knieh noh na ki. Kawei na kita ki hok tynrai jong ki ka long ban jied ïa ki nongmihkhmat. Katba ki ri jong ka pyrthei kiba shah synshar ha ki shipai lahduh, kiba synshar da ki Sorkar kiba ym burom khyndiat ruh ïa ki kynthei bad da u nongsynshar lahduh shimet, ki thrang hir hir ban ïoh ban jied ïa ki nongmihkhmat jong ka lynti jong ka jingsynshar paidbah. Hynrei, ma ngi kiba ïoh ïa kane ka lad, ngi khuslai bad ngim pyrwa bad ngi pynsepei ïa kane ka hok ka jong ngi ban jied ïa ki nongmihkhmat. Kine ki jingïapyninia, kine ki jingïakawang ktieh kawei ka seng saiñ hima sima ïa kawei pat, ki jingïakhuin ha ka por elekshon ki long kiba ym lait kiar bad ki pynpaw ba ki paidbah nongshong shnong ki don kata ka jingshit rhem mynsiem bad ka jingshaniah ha ka synshar paidbah. Kane ka jingpynlong ïa ka jingjied ïa u nongmihkhmat sha ka ïing Dorbar Thaw ka Meghalaya na ka bynta ka Sohïong Assembly Constituency ka pyni ïa ka jing jop jong ka Synshar Paidbah ha kane ka ri jong ngi.
