Ki ‘riewstad ki ïathuh ïa ngi ba baroh ki kam kiba ngi leh, ki dei kiba kyrsoi na ki jingmut jingpyrkhat. Ki kam kiba ngi leh, la ki long kiba bha ne ki ba sniew, baroh ki mih na ki jingmut jingpyrkhat bad na ka jingpun jong ka dohnud. U nongleh bha, un ym leh ïa ki kam isynei lymda u la pynshong nongrim shuwa ha la ki jong ki jingmut jingpyrkhat bad ri kyndong hapoh la ka jong ka dohnud. U nongpynïap briew, un ym leh ïa kata ka kam kaba lymda ki jingmut basniew ki la don lypa ha ki jingmut jingpyrkhat jong u. Hynrei, kane ka jingong ka lah ruh ban long kaba lait ha ki katto ki khep.
U briew uba khanap, u lah ban sbun kynsan kynsan lada kano kano ka jingjia ka ktah ïa ka jingsngew jong u ha kata ka por. Kum ban shu ai nuksa, lada uta uba khapnap, u ïohi lehse ba baroh ki ïanoh pisa ïa u nongpang, ma u ruh u lah ban ïa noh pisa lang. Kane ka long namarba kata ka jingjia ka ktah palat ïa ka jingsngew jong u. Hynrei, kane kan ym long ha kiwei pat ki por. U briew uba bha u lah ban kylla long u nongpynïap briew wat lada ym shym la don kum kata ka jingthmu. U lah ban leh ïa kaba kum kata ka kam tang na ka daw jong ka jingbym lah ban tehlakam ïa ka jingdom. U don uwei u briew uba la shah set phatok. Haba la kylli ia u balei u leit poi sha katei ka jaka, u la jubab, “Ha kawei ka sngi, nga la wan na lyngkha. Nga la thait, la jrem bad thngan haduh katta katta.
Ynda nga la rung ha ïing, ka lok jong nga ruh kam don ha ïing tip ka leit shang shaei. Ynda ka la wan, nga la thap ïa ka ba ka khlem shet ja. Hynrei, ka la shim pynban da ka lyngknot bad tied ïa nga. Ha kata ka jingdom, nga la shim da ka dieng thlieh bad tied ïa ka naphang. Ka lok jong nga ka la ïap bad nga shah set along hangne mynta.” Hynrei, ha baroh ki khep jong ka jingim jong ngi, dei ki jingmut jingpyrkhat kiba khyrwait shabi ïa ki jingleh bad ki kam ki jong ngi.
Lada ki jingmut jingpyrkhat jong ngi ki long kiba bha, ki kam ki ban mih na kata ruh kin sa long kiba bha. Lada ki jingmut jingpyrkhat jong ngi ki long kiba sniew, khlem artatien, ki kam ki ban mih ruh kin sa long kiba sniew. Lada ki jingmut jingpyrkhat ki dei kiba pynïaid ïa ka jingim ka jong ngi, te balei keiñ ngim ïa saiñdur noh ïa ki jingmut jingpyrkhat jong ngi da kiei kiei kiba khraw kiba lah ban rah ïa ka jingim jong ngi bad ïa ka imlang sahlang ha ki kyrdan kiba kham kynjang. Ki jingpyrkhat pihuiñ bad ki jingpyrkhat bishni ki dei ki diengpyngkiang ïa ka roi ka par ha ka imlang sahlang. Dei ban beh ïa ki shaba sep ka sngi.
U Mukesh K. Ambani u long uwei uba la kylla long u khun ka lak ka putit Krorpati. Ka Mary Kom ka la long ka khlur nongialehkai jingïakura ha ka lympung Olympic. Kine ki briew ki la long shisien ki ‘riew paidbah kum ma nga ma phi. Hynrei tang kawei kaba la pynlong ïa ka ban poi shaduh katei ka thong, kane ka long, ba ki don kata ka jingpyrkhat bakhraw ba ki dei ban pynurlong ïa la ka jong ka thong. Ka jinglah jong kiwei, ka dei ban ai mynsien ïa ngi ba ngin kot sha kata ka thong. Hato ngi don mo ïa ka pyrkhat pyrdain kiba kum u Myllung Soso Tham uba ong, “Ki jingmut bakhraw hapoh jong nga ki khih”.
