Ngi peit, ngi ïohi hynrei ngim shat jingmut. Kane ka ïadei eh bad kiei kiei ki bajia man la ka sngi. Kane ka lah ban long ïa kiei kiba bha lane ïa kiei kiei ki basniew.Teng teng haba ki briew ki leh ïa ki kam ki babha. Ngim shat jingmut bad kaei kaba ki leh ka long shisha kaba bha bad kaba myntoi. Teng teng haba ngi ïohi ïa ka jingsniew, ngim pynleit jingmut shaphang kata bad kata ka jingsniew kam shat jingmut ïa ngi. Ngi kyndit bynriew ynda la mih ki jingjia basngewsih. Kum ban shu ai nuksa; lah ban don kiba lehbha ïa ki khynnah. Ki ri ki sumar, ki aibam ai dih bad ki pynshong skul ïa ki. Ngi kyndit bynriew bad ngi sngewthuh ba kata ka kam ka long kaba bha ynda ki nongleh bha ki ïoh khusnam lane kita ki khynnah ki wan rah khusnam na ka bynta kata ka jaka ba ki pule bad ki shong ki sah. Ka lah ban long ba ka don ka pata kiad ha ki shnong ki jong ngi. Ngi ïohi ïa ka jingsniew jong ka. Hynrei ngi shat jingmut ba ka jingdon jing kata ka pata kiad ka long kaba sniew haduh ban mih ki jingjia basngewsih. Ka long kaba sngewtynnad ba ka Hyññiewtrep National Council ka la pynpeit ïa ki khmat ki jong ngi haba ka kdew ba ka jingpyndonkam ïa ki khynnah ha ka jingjied nongmihkhmat ka long kaba bakla. Kane ka sengbhalang, ka la kyntu ïa ka Deputy Commissioner ka East Khasi ban ym shah shuh nangne sha khmat ban pyndon kam ïa ki khynnah ha ka por jingjied nongmihkhmat. Sngewtynnad ba kane ka seng ka la pynsngew ba ki khynnah ki dei ban pynleit jingmut ha ki jingpule.
Ka por jong ka jinglong khynnah, ka la long kaba kordor. Ka long ka por ba ngi saiñdur ïa ka lawei baphyrnai ka jong ki, la ka long na la rympei, ka skul, ki jaka ai jinghikai, ki ïingmane Blei ne ki lympung kiba hikai ïa ka akor ka burom lane ïa ka tip briew tip Blei. Ka imlang ka sahlang bad ma ngi ki kiba la ïoh ban kheit ïa u sohbathiang jong ka thoh ka pule bad ïa ka jingnang jingstad, ba ngin ïa pynsngwlem lem ïa ka jingkordor jong ka jingpule jong ki khynnah. Ka jingïashim bynta jong ki ha ki kam saiñ hima sima ka sa long ynda la biang ka por. Ki jingshah shim kabu jong ki khynnah ki long kiba bun ha pyrthei. Ha ka por thma, ki nongshun ki pynlong stieh ïa ki khynnah. Ha ka jinghiar thma jong ka Russia ban kurup ïa ka Ukraine, la rah jubor ïa ki khynnah na Ukraine sha Russia. Kane ka jingshim kabu ïa ki khynnah ka long kaba kynrei haduh katta katta ha kane ka jylla Meghalaya jong ngi. Ha ka jaka ba ki kynnah kin don ha ki skul bad ki jaka pule, ngi ïohi pynban ia ki ba ki ba ki bylla shoh mawria, ba ki trei shakri ha ki iing ki sem ki jong ngi.
Ngi iohi ïa ki ba ki leit bylla saitjaiñ, ki kam shong dukan bad kiwei. ïa ki la pyllong ban leh kumta na ki jingjia ha ïing hasem bad lada ym leh ïa kiba kum kita ki jait kam ruh lah ban ïapthngan. Hynrei, ïa kaei kaba ngi sngewthuh ba ka long ka babha ngi dei ban leh ïa kata. Ka Riti Synshar jong ka Ri India ka ai ïa ka hok jong ki khynnah bad kumno ban ïada ïalade. Ka hok kaba nyngkong kaba ki dei ban ïoh ka long ba kin im, ba ki ïoh ïa ka bam ka sa, ka jaka shong ka jaka sah bad ba ki ioh ruh ïa thoh ka pule, ka leit skul ka shongsklur, ba kin ïoh ïa ka jingnang jingstad kiba long u shabi na ka bynta ka lawei baphyrnai.
