Ka ïing Dorbar Thaw aiñ jong ka Meghalaya, kaba don hynriewphew ngut ki nongmihkhmat, ka la kylla long ka ïing dorbar thaw aiñ ba pura. Ha ka jingpynlong ïa ka jingjied nongmihkhmat sha katei ka ïing dorbar ha ka 27 tarik u Rymphang, 2023, ka la ïoh ban jied tang 59 ngut ki nongmihkhmat. Ka daw jong kane ka jingbym lah ban pynlong ïa ka jingjied ïa baroh ki hynriew phew ngut ki nongmihkhmat ha ka juh ka por, ka long namarba ha katei ka por, namar ymlah shu ban pynlong ïa ka jingjied nongmihkhmat, uwei na ki kyrtong jong ka Sohïong Assembly Konstitwensi, u Bah H.D.R. Lyngdon uba long u kyrtong jong ka United Democratic Party bad u ba long u Myntri ki kam pohïing ba mynshuwa jong ka Meghalaya u la khlad noh.
Ka jingpynbna ïa ka result na ka bynta ka jingjied ïa u nongmihkhmat jong ka Sohïong Assembly Konstitwensi, ka la pynkiew ïa ka jingdon jong ki dkhot ong ka UDP na ka 11 ngut sha ka 12 ngut. Kumba ju long ha ki por bamynshuwa bad kum juh ruh ha kine ki sngi kiba mynta, ki jngialap elelkshon, ha kiba bun ki khep, ki long kaba dap sa tang ki jingïakawang ktieh, ki jingïathad, ki jingïakynnoh uwei u kyrtong ïa uwei pat. Teng teng, sngew thamula wat ban sngap ïa ki jingïalap jong ki nongïalam jong ngi kiba la don ha kata ka kynjang jong ka imlang sahlang bad jong ka Sorkar ruh. Haba kylli ïa ki balei phi kren kum kito ki jait jingkren ha ki por elekshon. Ka jubab jong ki ka long ba kita ki jingkren jong ki ka dei ban ïahap bad ki nongbuh jong ki khnang ban jop elelkshon. Lada um lah ban pynngeit ïa ki, yn ym lah ban jop elekshon. Ka jinïapeit khmat ha ka por elkshon ruh ka jur bha.
La don ruh ki jingkren na ki nongmihkhmat ki jong ngi kiba ong ba ki kam pynroi ki dei ban noh tang sha kito kiba kyrshan, lehsa ka lah ban long ka nia ban jop elekshon. Ha ka ri synshar paidbah kum ka ri India ka jong ngi, ki nongshong shnong ki don ka hok ban kyrshan lane ban ym kyrshah ïa uta u kyrtong. Ka shong ha ka jingsngewthuh jong ki ïano ban jied. Mynta ba ka ïing dorbar thaw aiñ kaba dap ka la pura, la sngew dei ban ong ba ki jingkren ha ki por elekshon kim dei ban ïoh jaka ynda la dep ka elekshon. Ki nongmihkhmat jong ngi ki dei ban sngewthuh ba ym dei tang kata ka kynhun kaba kyrshan kaba pynjop ïa u. Ki dei ban sngewthuh ba kiba pynjop ïa ki, ki dei ki paidbah. U nongmihkhmat um dei tang na ka bynta jong kawei ka kynjuh.
Uno uno uba la shah jied kum u nongmihkhmat jong ki paidbah, u dei ban peit lang ïa ka bha ka miat jong baroh, la ki long kito kiba kyrshan ïa u lane ki bym shym la kyrshan ïa u. Ki kam pynroi ki dei ban noh shato kito kiba donkam. Ka kamram kaba nyngkong eh ïa uno uno u nongmihkhmat bad khamtam lei lei ïa kito ki nongmihkhmat kiba don hapoh jong ka Sorkar, ka kamram kaba nyngkong jong ki ka long ban shna ïa ki aiñ kiba ban ïada ïa la ka jong jaitbynirew bad kumjuh ruh ïa ka roi ka par jong ka jylla. Ki nongmihkhmat kum u Bah Martin Majaw, ki la long ka nongmuna ha ka synshar khadar. Dei lyngba jong une u rangbah uba thoh hi ïa ka mang tyngka jong ka Sorkar Meghalaya bad ka jingwanrah jong u ïa ki Land Transfer Act ba ka khyndew ka syiap ka jong ngi ka dang neh haduh mynta.
