Ka jingïaid jong ka por, ka la pynkylla ïa kiei kiei baroh ha ka pyrkhat pyrdaiñ jong u briew khamtam na ka jingroi sted ki jingsted shembuit jong u briew ha kane ka juk mynta ha kaba kiei kiei la shu ïoh suk ha kti, ha ïing ne hangno hangno ba ki briew ki kwah. Ar phew snem mynshwa, ka jingiapher ka long kaba la palat liam shisha ban ïanujor bad mynta. Mynshwa, ki nongkyndong ban wan sha Shillong hap ban pyrkhat bunsien naduh ka leit ka wan, ka pisa ka pilaiñ, ka bam ka dih, ka thied ka pet, namar ki kali ki motor ki dang duna, ka jingïasam ne pyntip khubor ruh ka dang shim por namar hap ban leit da ka met, da ka kali bad kumta ter ter. Ki briew haba ki leh ki hap ban pykhat bha, ban puson bha ïa ka duh ka ïoh, kaba dei kaba lait. Hynrei mynta plak, ka juk ka la kylla bad ka jingkylla kaba sted tam, ka dei na ka jingshem buit ïa ka mobile, ïa ka TV, lyngba ka kor Internet.
Ki briew kila nang stad, kila nang suk ban ïoh ïa kano kano ka jingtip, ban poi sha kano kano ka jaka, ban thied ïa kano kano kaba ki kwah namar la suk la don lut katba kwah ha kti lajong khlem da donkam shuh ban phah briew ne ban leit sha ïew sha hat lait noh tang ki jait kam ha jaka sor, watla kam pat da biang lada kren sha nongkyndong. Ki briew kila nang kiew ha ka spah ka phew, ka kamai kajih, watla ki dang bun bah kiba dang duk. Mano ban mut dur ba na khappud Bangladesh lah bad ïoh ban ïakren thik thik sha Delhi, sha London, bad lah ruh ban ïohi kumba ïakren ha la ïing. Ka jingstad jong u briew, ka la pynïajan shisha ïa kiei kiei bad khamtam ia ki para briew na kawei ka ri sha kawei. Ha ka jingshisha, ka jylla Meghalaya ka dang sahdien bha haba peit ïa ka jinglong jingman jong ki briew hynrei kan hap ban ïabeh katkum ka jingtyllun jong ka por namar lada ym leh kumta, kan sa sah marwei shadien.
Hynrei haba phai sha ka kam synshar khadar ha kane ka jylla, ym lah ban pyneh patho ba la iakiew, ba la ïastad, hynrei ka pyni ba ka jingmut jingpyrkhat jong ki briew ka dang sahdien bha haduh katta katta. Mynshwa, ki nongthaw aiñ ne kita ki nongmihkhmat kum ki MLA, MDC, MP la jied ïa ki briew kiba kynsai, kiba shem-phang, kiba ïar ka jingmut jingpyr-khat, kiba ïohi jngai, kiba khuid, kiba hok. Hynrei ha kine ki sngi, kam long shuh kumta, bad kane baroh ka dei na ki paidbah. Haba peit ïa ka jinglong ki nongmih-khmat ha kane ka juk, mynta, ym lah ban len ba ka jingkynnoh ka dei ban leit sha u paidbah, namar ba lada beiñ ïa ki nongmihkhmat, ki paidbah ki dei ban shah kynnoh nyngkong namar ba dei maki, kiba jied kiba pynshong shuki ïa ki. Kumta, katba ka pyrthei ka nang shai, nang stad, hynrei ka pyrkhat pyrdaiñ pat jong ki briew ka la nang sahdien, ka la nang hiar arsut, bad ka daw baroh, ka long ba ki briew kila ïamareh ban leit beh ïa ka pisa, haduh ba kim sngewthuh shuh ïalade haei ki don, bad kaei ka jingkitkhlieh. Ka Meghalaya kan sa leit sha ka lympung jied biang ïa ki MLA ha ka sien kaba khadwei ha u snem 2023 sa tang kumba 2 bnai eiei mynta. La ïaid khadwei sien ban jied tang ia ka elekshon MLA, MP, bad la palat ïa ki MDC, bad ka la dei ka por ba ki paidbah kin sngew-thuh kham bha kumno ban pyndon-kam ïa ka hok jongki, hynrei lada kim lah ban bat ïa kane ka jingkitkhlieh, ka jingjied MLA ha kane ka elekshon 2023, kan long kumjuh kumba la mad ha kine ki 20 snem ba la leit.
