Shwa ka elekshon ka la don ka jingther kaba jur bha na ka BJP pyrshah ïa ka NPP da kaba kynnoh ba ka dei ka parti kaba bamsap tam. Wat u Myntri ka tnad kam pohïing ka ri u Amit Shah ruh u la ther ba kane ka sorkar ka dei kaba bamsap tam ha ka ri India. Kane ka jingkren u Amit Shah ka la pynjah burom khait ïa ka jylla Meghalaya bad ka la shah pynbud nam ba ka dei ka jylla kaba jur tang ki nongtuh ki nonglute khamtam ki briew kiba don ha ka bor sorkar. Shwa ïa kane, ka BJP ka la thad ïa ka NPP haduh ba ka la thoh sha ka seng kmie New Delhi ban weng noh ïaka jingkyrshan na ka sorkar MDA-1 hynrei haduh ban kut ka samoi san snem ruh, ka shu sah tang ha ka jingbyrngem khlem poi shaei shaei ruh.
Hynrei tang hadien san sngi ba la dep ñiew ïa ka votes, plak ka la ktah mat ïong ïa ka BJP ha kane ka jylla ba ka jingkynnoh, ka jingkynthah jongka ïa ka NPP, ka dei tang ka nia khynnah rit, ka nia kai ban pynbieij ïa ki paidbah ka jylla ha ka por elekshon. Ka jingkren u nongïalam ka BJP, u Chuba Ao uba peit ïa ka parti BJP ha kane ka jylla, ka la pynking klong syndon ïa ka BJP bad kan nang pynngam ïa kane ka parti sha liewlep nalor ba ka la dei lypa ka parti kaba la ijli jur ki paidbah ha kane ka jylla. Katkum ka jingkren u Ao sha ki lad pathai khubor, ka jingkynnoh ïa ka NPP ba ka dei kaba bamsap tam, ka dei tang ka nia elekshon ban pynbieij ïa ki paidbah nongthep kane ka jylla bad tang hadien san sngi kila ïathaw sorkar lang. Ka jingkren jong u, kam dei tang ba ka la pynjah burom ïa ka BJP hynrei ïa ki nongïalam jongka ruh bad ka la pynpaw hakhmat u paidbah ba ka dei tang ka suri kup snieh langbrot jongno re jongno. Hordit hordang, ki paid-bah ka jylla Meghalaya kin ym ngeit shuh lada ka BJP kan ong eiei namar ba kin shim ba ka dei tang ka jingthok jingthak ïa u paidbah hadien ba kila ïohi bad ïoh sngew ïa ka jingkren jong une u nongïalam ka BJP.
Khlem pep, kane ka jingkren jong une u nongïalam ka BJP kan poi wat shaduh ka tyndong shkor jong ki nongïalam ka parti seng kmie. Lada ki nongïalam ka BJP seng kmie kim leh eiei ïa kane ka jingkren jong u Ao, ka mut ba kila mynjur lang ïa kane ka jingkren jong u bad kan long ka jingeh kaba khraw ïa kane ka parti ban wan bsuh khlieh ha kane ka jylla nangne shakhmat ha kaba ki paidbah kin ym ngeit shuh ïa kaei kaba ki kren bad kin shim beit ba ka dei tang ka nia elekshon ka bym don nongrim haei haei ruh.
Kumba la ïohi, ka BJP kam ïoh jaka satia ha kane ka jylla Meghalaya naduh ba ka wan ban ïakhun elekshon ha ki snem 1993, ka jingjop jong ka, ka shun eh beit tang 2 ne 3 ngut ki MLA bad lait nangta, kam lah ban thaw pyrthei katba kiwei ki parti kum ka Congress ka la jop bun ngut bad ïalam ruh ïa ka sorkar ha kane ka jylla la bun-sien. Kumta, ki nongïalam ka BJP ki dei ban pyrkhat shispah sien ïa ka jingïadei ka parti ha kane ka jylla Meghalaya. Ka jingkren u nongïalam ka BJP ba peit hangne ha Meghalaya kan pynhiar jraiñ ïa kane ka parti kaba dang ïaksaid tyngeh ha kane ka jylla.
