Ka rai jong u paidbah ha kane ka kynti ban jied ïa ki nongmihkhmat sha ka ïing dorbar thawaiñ kala pharia phraw raw phraw ha ka bynta ka Khasi Hills, katno katne ha Jaiñtia Hills bad kham pyllun ha Garo Hills. Ha Khasi Hills, la bun khleh bun lang ki parti bapher bapher watla ka UDP ka la kham ïoh bun, katba ha Jaiñtia Hills ka la kham pyllun tang hapdeng ka UDP bad ka NPP. Ha Khasi Hills ka rai jongki paidbah ka shai kdar ba kim kwah ïa ka NPP, ha kaba ka NPP ka jop tang ar tylli ha East Khasi Hills, bad ar tylli ha Ri Bhoi katba ka bun bha ha Jaiñtia Hills kaba jop 4 ngut katba sha West Khasi Hills, ka ïaid thylli.
Ka NPP ka la leh bha sha Garo Hills kumba la khmih lynti haduh 18 ngut ka jop ban poi sha ka jingkheiñ kaba 26 ngut ki MLA haka ïing dorbar kaba 60 ngut. Ka BJP ka la dei ban sngewthuh ba kam lah ban leh eiei ha kane ka jylla Meghalaya namar ka number jongka, ka shu kut beit tang ha ka 2 ngut kumba la khmih lynti ki paidbah. Ka UDP ka la leh bha na ka 7 shaka 11 ngut, ka PDF ka la hiar sha ka 2 na ka 4 ngut bad kumjuh ka HSPDP ka dang neh kumjuh da kaba jop tang 2 ngut katba ka Congress ka la thangïong ngaiñ tang 5 ngut bad kumjuh ka TMC kaba ïoh MLA lypa ne ready-made MLA 12 ngut sha ka 5 ngut. Hynrei kaba kham pynkyndit briew ha kane ka kynti, ka dei ka jingïoh rung ka VPP kaba dang shu thaw shen hynrei ka la lah ban jop haduh 4 ngut ki MLA ban pynliem ïa ki MLA ba mynta bad ka la leh bha ha ki katto katne ki konstitwensi ban wan balai bad baar. Ka jingjop ka VPP hapoh ka jingïalam u bah Ardent M Basaiawmoit haduh 4 ngut ka la pynkhynñiuh bad pynkyndit ïa ki briew khamtam ki samla kiba la angnud ïa ka jingkylla.
Na ki dak ki shin, ka UDP bad kiwei ki parti kiba ïadon lang haka sorkar MDA kaba la dep, kata ka HSPDP, PDF ki kham ngiah ban ïadon bad ka NPP hadien ba kila ïa bam ja lang baroh san snem bad ïather khlem sangeh ha ka elekshon hapdeng para maki. Kiba bun ki paidbah na kylleng ka Khasi bad Jaiñtia Hills ki khmih lynti ba ka sorkar kan dei beit bym dei ne bym don lang ka NPP ne ka BJP bad ki kwah ban ïoh ïa ka sorkar kaba thymmai ha kaba ki khmih lynti ban ïohi ïa u bah Ardent, u bah Paul bad kiwei ki nongïalam ba kham samla ban pyni ïa ka jingtbit na bynta ban shakri ïa ka jaitbynriew ha kine ki san snem ban sa wan. Hynrei katba ki paidbah ki dang ap khmih lynti ban ïalam sorkar ki seng riewlum, plak lak lak pynban, ka UDP, PDF, HSPDP kila mareh thong ban leit sha u Conrad K Sangma ban ai ka jingkyrshan ban thaw sorkar. Soit lip ka ding jingangnud jong ki paidbah bad mynta kaba sah ka long ba ki ap khmih lynti ïa ka VPP kaba ïalam u bah Ardent la kan dang ïeng skhem ha ka nongrim ne em ne kan shet kumba shet kine kiwei pat ki seng bym lah shan na ka jinglut ha ka elekshon.
