Ki dawai kynbat ba u khun bynriew u pyndonkam na ka bynta ba un shait un khlaiñ, un khiah krat khiah stang bad ba un lait na kiba bun ki jing-pang, ki long kiba u khun bynriew u la pyndonkam mynta da ki spah spah snem ha ka pyrthei. Ia kane ka jait jingsumar da ki dawai kynbat ki long kito ki jaitbynriew riewlum, ki jaitbynriew kiba dang sah khyrdong hangne hangta. Ym tang katta, ka jaitbynriew Hyn-niewtrep ruh ka la pyndonkam ïa ki dawai kynbat mynta la da ki spah snem. Ïa kane ka jingstad dawai kynbat, la ai pateng da kito kiba tip ïa kane ka rukom sumar na kawei ka pateng sha kawei pat.
Shuwa ba ki Phareng ki ïoh ban ïuhkjat ha ka thaiñ Shatei Lam Mihngi bad hangne ka Ri Khasi Jaintia, ki khun u Hynniewtrep ki la da tip him kumno ban sumar ïalade na kiba bun ki jingpang. Hangne ha ka Bri U Hynniewtrep, ngi tip kumno ban sumar ïa ki khun kiba dang rit jong ngi. Ha ka por ba ki dang khunlung bad dang rit bad haba ki ïoh ïa ka jingpang kpoh, ha kine ki sngi kiba mynta, ngi ai ïa ki khun jong ngi da ka dawai Gripe Water. Hynrei, ki long-kmie jong ngi, ki la tip kumno ban sumar ïa ki da kaba ai da Ñiang-sohpet. Wat haduh kine ki sngi, haba pang shitmet, pang baïong khlieh bad suhkhriat, ki pynsleh ïa u nongpang da ka umsoh Kwit. Ki khun u Hynñiewtrep ki tip ban sumar ïalade. Haba pangjyrhoh, ki briew ki khleh ïa ka umngap bad u Sohmarit bad shen shen u nong-pang jyrhoh u jem noh. Sngew lyngngoh ba tip ba u Khasi uba long uba stad haduh katta katta ban sumar ïa kito kiba kheiñ shyieng. Ha kane ka jingsumar kaba kyn-thup ïa ka jingpynbeit shyieng bad sop pat ïa kata ka jingmynsaw da ki kynbat ba ki nongsumar ki kheit na khlaw. Hadien ba kine ki kynbat ki la sdang ban duna bad ban duh jait bad ba shitom ban ïoh na ka daw jong ka jingthang khlaw dusmon jong ki briew bad ruh na ka saw jong ka jingrep bun, ha kaba ki nongrep ki hap ban pynngat ïa ki khlaw bad ban thang ïa ki dieng ki sieh bad ki tnad khnang ba kan sboh ka khyndew, mynta ki la sdang ban thung noh ïa kine ki kynbat dawai ha ki jaka lajong.
Sngew tynnad ban tip ba don katto katne ki briew hangne hangne ha Ri Khasi jong ngi kiba nang ban shan ïa ki dawai Homeo-pathic na u jynthung Jinseng uba mih tang ha ki katto katne ki jaka jong ka pyrthei, kum ha Korea bad Ri Khasi Jaiñtia. Ha kane ka long ba une u jynthung u long bha ha kine ki jaka na ka daw jong ka jinglong kyrpang jong ka suiñ-bneng. U President barim jong ka Ri India, u Dr. APJ Kalam uba wan na nongkyndong, wat lada u la long uwei na ki stad saïan ha kaba pynmih ïa ki tiar pynbthei nuclear hynrei, u la long pat uwei uba sngewthuh bha bad pynshlur ïa ka jingrep ia ki jynthung ban shna dawai kynbat ha Ri India. Ka Sorkar ka dei ban pynshlur ïa ka jingrep ïa ki jynthung bad ki kynbat ban shna ïa ki dawai kynbat. Ki briew ki shaniah ïa ki dawai namarba ba lah ban thied ia ki ha ka dor kaba kham tat. Ka jingdih ïa ki dawai kynbat kim ktah ïa ka jingkoit jingkhiah jong u nongdih ïa kita ki dawai hynrei ki pynkhlaiñ ïa ka bor met bad bad pynkoit na ki jingpang.
