Ha kane ka elekshon 2023, imat kumba la sawa jur ka sur na ki paidbah ki paidkar, ki paidknup paidtrap ba ka buit jong ki kyrtong bapher bapher ban khring ïa ki nongthep vote kam dei shuh da ka jingstad, ka jingshemphang, ka jingïatai ïathir ïa ki mat ki jura hynrei la shu ïangop baroh baroh ban ïakren tang ïa kata ka pisa shi ka pisa. Kaba kham sngew biej ka dei ba don ki briew kiba leit pan pisa khnang na ki kyrtong ban thied kot, ban thied uniform, ban thied sopti, ban thied dawai, ban thied tin, ban thied kiba lai phew jait. Kane ka jingshim kabu ki nongthep vote na ki kyrtong ha kane ka por elekshon, ka la pyllong ruh ïa ki kyrtong ban thaw kabu kylla na ki paidbah ban siew kylliang ïa kaba ki la ai pisa. Hooid, ki don kiba donkam shisha kiba hap ban ïarap kyrkieh hynrei kiba shim kabu kam dei ka lynti kaba bha. Namar ba ki kyrtong ki ïohi ïa ka jingkangar pisa jong ki paidbah, ka la khring ïa ki ban shim kabu khnang namar ba ki sngewthuh ba kam don jingmut ban ïakren ïa kano kano ka mat hynrei u paidbah u peit bad kwah beit tang ïa ka pisa bad dei hangne ba kiba don spah ki bym bna eiei ïa ka synshar khadar, ïa ka saiñ dur saiñ dar, ïa ka mat kiba pher bapher, ki bym don ka jingnang jingstad, ka jingpule kaba biang ruh, hynrei kin khie na jingthiah bak ban rah pisa ban pynbieij ïa u paidbah ban ïakhun ïa ka elekshon.
Mynta, ym don ba ïakren ïa u kyrtong uba kumno, hynrei ki kylli bad kren shwa uta u kyrtong u don pisa ne em. Kane ka jinglong jong ki briew ka la long shisha ka jingsahdien ka jabieng ban pyrkhat tang ïa ka pisa ïohei. Ka jinglong ki paidbah nongthep vote, ka pyni ba ka jylla Meghalaya ka dang sahdien ha baroh ki liang khamtam ha ka jingmut jingpyrkhat, ha ka pyrkhat pyrdaiñ, ha ka bishar ka khadar, ha ka treikam treijam bad kumta ter ter. Lait noh tang ha ki katto katne ki jaka ne ki konstitwensi ba ki paidbah ki la kham sianti, ki la kham stad ha kaba ka pisa ka lah ban ym treikam pura. Kala don ka jingong ba ka don jingmut aïu ban nang ban pule haba ka jingpyrkhat pat kam nang ban pyrkhat ne ha ka ktien nongwei ki ong highly literate but not educated (stad pule palat liam, jingmut jingpyrkhat pat kam shai). Lada ki paidbah kim pat nang kim pat sngewthuh kim pat shai, kim pat lah ban ïaleh pyrshah ïa ka bym dei, kim pat lah ban ïaleh pyrshah ïa ka jingshah pynbiej, ïa ka jingshah pynngop, kata ka mut ba ka jingkhmih lynti ban ïoh ïa ka jingkylla kan long tang ka kam tamasa.
Ym lah ban len ba ka jingshah pynbiej ki paidbah ka dei na ka jingsahdien, ka jingduk, ka jingsahbiej bym tip ïa kano kano ka rukom pynïaid ha ka liang ka sorkar, ka synshar ka khadar bad kane ka la pyllong ïa ki ban shah ïalam bakla ha ki riew shim kabu, kiba wan ban pynbiej da ka pisa, da ka tiar ba laiphew jait ha kine ki khyndiat sngi shwa ban thep, khnang ban pynklet noh ïa ki ïa ka jingsyllang kaba baroh san snem duna. Kumta, watla ki don kiba ong ba lada don kiba wanrah ne ai pisa, dei ban shim arti arjat haba tyrwa hi u briew hynrei ïa ka vote kisar vote rupa ym dei ban ai satia khnang ban pynthngad ïa ki phlanduman, ki riew shim kabu na bynta ka malade.
