Ka elekshon ban jied ïa u MLA ne u nongthaw aiñ kan long sa tang lai sngi mynta, kata ha ka 27 tarik ka sngi Nyngkong mynta u bnai ha kaba ki 21 lak ngut tam ki nongshong shnong ka jylla kin ïoh ïa ka bynta kaba dei ka hok jongki ban jied ïa u kyrtong ba ki mon da kaba khan, bishar bniah bad pynshong nongrim bad kumjuh ïa ki nongrim jong ki seng saiñ pyrthei bapher bapher kiba la pyni ïa ki nongrim jongki naduh ki seng trai jylla haduh ki seng nabar jylla ne ki national parti.
Hynrei kumba la sngewthuh, dang bun ki paidbah ki bym sngewthuh ïa ka nongrim, ki bym tip ïa ka jingjied ïa ki MLA bad kumno ban jied ïa ki, bad ki dang ngop ha ka bor jong ka pisa. Ha ka mynsiem ki briew shisien ba la shim ïa ka pisa, ki sngew biej, ki sngew ktah ia ka mynsiem ban ym ai vote bad ki shu thep noh wat lada kim mon kim kwah ne kim sngew don nongrim eiei ruh ïa uta u kyrtong. San snem duna ki kren bitar, ki thnum ïa ki kam jong u MLA hynrei hadien ar sngi lai sngi, kila kylla noh ka jingmut jingpyrkhat tang namar ba ki ïoh pisa. Kane ka jinglong ka treikam bha ym tang ha sor hynrei ka jubor bha sha ki jaka nongkyndong, ha kaba ki briew ki shah pynngop beit ha ka bor jong ka pisa tang shimiet shwa ban thep vote. Lada u paidbah u ngop ha ka bor ka pisa tang ha ka shimiet, da kaba klet noh ïa ka jingsuhsat, ka jingeh, ka jingbymler, ka jingshah shiliang, ka jingsngew sarong, ka jinghangamei, ka jingkyreit, bad sngew donbor, kata ka mut ba ka pyrkhat ka pyrdaiñ jong ki nongthep vote ka la phet noh sha khlaw, ha kaba ka bor jong ka jingpynbiej ka la kham khlaiñ bor ïa ki. Lada ka jingshah bakla ka kham khlaiñ ban ïa ka pyrkhat pyrdaiñ jong ki briew, kata ka la dei ka jingshah rem lypa ha uwei pa uwei u briew bad ka jingshisha kan sa shong sha kyndong soit.
Ka la don ka jingma kaba shyrkhei bha mynta lada ki briew ki ngop ha ka jingshah pynbiej, ha kaba ka jingshisha kan leit rieh noh sha khlaw. Haba ka jingshisha ka phet sha kyndong, ka jingthok, ka jingpynthame, kan ïoh ban shad ban kmen ha ka dohnud jong ki briew bad hangta kan wanrah ïa ka thaw shong thaw sah kaba kynrum kynram, ka bym shngaiñ bym shker shuh, bad kan bun ki jingsniew kiba laiphew jait ha ka imlang sahlang, kaban tan shadien ïa ka jingbha jingmiat jong ka shnong ka thaw, ka ri bad ka jaitbynriew. Ka la donkam shisha ka jingmut jingpyrkhat kaba khlaiñ ha kum kane ka por ïa ki paidbah khnang ba kin lah ban ïaleh pyrshah ïa ki bor jong ka jingpynthame ba laiphew jait ha ki khwan myntoi ïa ka malade. Ki paidbah ki dei ban ïaleh pyrshah ïa ka jingpynthame, ki jingpynbeit da kaba SHIM ÏA KA PIS, WAT AI IA KA VOTE bad tang katta, ki riew khwan myntoi, ki khwan malade kiba kopia, hangamei, sngew stad, sngew sarong, kin sa phet krad soit sha kyndong.
