Ki mat jingdawa bapher bapher jong ka jaitbynriew kiba la da ki phew snem kiba la ju dawa ki paidbah na ka por sha ka por, kila shu sahkut beit lyngngai haduh mynta watla ka jylla kan dap 50 snem ka jingïoh la kajong. Ha kine ki 50 snem duna, ki mat kiba kongsan kiba ju la dawa ki kynthup ia ka jingtehlam ïa ka jingwan rung beaiñ ki briew nabar ban wan nongshong shnong ha kane ka jylla kiba shu wan poiwir poihap naei re naei.
Ka jinglaitlan jong ki briew ban wan rung sha kane ka jylla, ka la long ka jingma kaba shyrkhei bha mynta bad kumba la sakhi da ki spah bad ki hajar kiba wan rung beain sha kane ka jylla bad shisien ba kila rung, ym don dak mih shuh namar ba kila bsuh sha ki jaka ba ki ïoh rieh tngen ha ki jaka bapher bapher ka jylla. Ka jingma jong ka jaitbynriew mynta ka la long kaba shyrkhei, ym namar bym don ka roi ka san, ym namar bym don ki skul, ym namar bym don ki lad sumar, ym namar bym don ki kam khaïi pateng bad kiwei ki kam, hynrei namar ka jingioh rung suk ki briew nabar bad sa ka shongkha shongman ia ki kynthei Khasi.
Ka jinglaitlan ki jaka rung bad ki jaka riehtngen ha kane ka jylla, ka long ka jingma ka bym lah ban thew. Katto katne ki jylla kiba don ha kane ka dong mihngi kila dep shah rem ha kane ka bynta ban ïada ïalade, bad kawei na ki, ka dei ka Tripura, bad kiba bun ki bynta ha Assam kiba la shah buhai shnong ki briew kiba nabar. Hynrei ka don pat ka daw balei ki briew kiba nabar ki ïoh rung sha kane ka jylla katba ki mon bad ha kano kano ka por ruh bad, ka daw ka dei na ki briew jong ngi hi namar ba ki don kiba long ksiang kiba ïalam ïa ki ban kamai spah ialade ban khot nongbylla, bad ban die ïa la kyrteng ban leh ia ki kam khaïi ha ka kyrteng jongki.
Nalor kiba bun ki aiñ ba ka sorkar ka la pyntreikam bad kiwei ki jingdawa ki paidbah, ki kynhun bapher bapher ki la dawa kum ka ILP, ka MRSSA, ka Land Transfer Act, ka Benamai Act, hynrei kine kim lah ban tehlakam eiei kumba ka la paw. Imat kaba donkam bad kaba kongsan hangne ka dei ban phai khmat noh sha ki dorbar shnong, sha ki dorbar kur ban pynkup bor ïa ki ban iatynrong lem ïa kane ka kam khnang ba u nongwei, u sohshnong un ym lah ban shu rung pathar khlem da iaid katkum ki kyndon. Ka sorkar ka la dei ban leh eiei ban wanrah ïa ka aiñ halor kane, ba ki dorbar shnong nalor ba ki la leh ia ka bynta ha kiba bun ki kam ba kongsan, ka la donkam sa kane ka bynta kaba kham kongsan ban ai bor ïa ki khnang ba kin long kum ka atiar tynrai ban ïada ïa ka jaitbynriew. Bunsien ka jingpyntreikam ïa ki ain ka shu long tang ha kot sada watla ka sorkar ka la don ki briew kiba la siew tulop, kiba la biang ki tiar bad ki jingdonkam.
Na ka bynta ban pynlong kam ban pyntreikam pura kumba ka dei, ka la dei ïa ka sorkar bad ki politishian ban sangeh noh ka jingïaleh politik lym kumta, ki mat kin shu sahteng na ka por sha ka por bad ban ïabyrngia kai ban ïaktaid tang ha ka por elekshon.
