Kano kano ka kam, kan ym long kaba jop lada tang ki pulit ki ïakhun kham-tam ïa kiba ïadei ha ka imlang sahlang kum ka jingkynrei u drok, kam tuh kam thiem, ki kam thom-bor, ki kam tim sih tim sang ha ki shnong ki thaw bad kiwei ki kam bymman. U Myntri Rangbah ka jylla u Conrad K Sangma hapoh ka ïing dorbar dang shen u la ong ba ka sorkar jylla kala shim khia ban ïakhun pyrshah ïa ka jingkynrei u drok ha ka imlang sahlang bad 726 jingjia la rejister bad 1330 ngut ki la kem kiba donkti ha kam khaïi drok. La sngewthuh ba u Myntri Rangbah u la shaniah ha ki pulit ban tehlakam ïa une u ïakjakor ka imlang sahlang bad bad ka la don ruh ka jingpynkhreh ïa ka aiñ ha kaba ynda ka la treikam ka Preven-tion of Illicit Traffic and Narcotic Drugs and Psychotropic Substan-ces Act yn pyrkhing bha ïa ki nongkhaïi drok.
Halor ka jaka buh ïa kiba kyrni drok, u la ong ba la ïakren ïa ki seng kiba pynïaid ïa kine ki jaka pynkylla ïa kiba kyrni ha ka drok, ha kaba ka sorkar kan ai ka jingkyrshan ïa ki.
Ka thma pyrshah ïa u drok ka long kaba shyrkhei haduh katta katta, bad ym lah ban len ba ki pulit kim pat lah ban tem ïa kane ka jingma namar ba ka don ka jingïadei kaba ïar bha hapdeng ki nongdie, ki nongkhaïi naduh kiba heh haduh kiba rit bad kumjuh ïa ki nongpyndonkam. Ka jingeh ka long namar ba kim lap ksai nangno u mih u drok watla ki ïoh jingtip ruh ïa ka jingwan jong u drok hynrei ka lynti kaba jwat bha ban khang namar ba ka don kylleng ki jaka. Ka daw kaba pyllong ïa ki briew ban thom ban khaïi ïa une u mar ba pynma shibun ia ka imlang sahlang ka dei namar ba u don ka dor iew kaba heh bad u lah ban pynriew spah kynsan ïa u briew bad na kane ka daw, kampher lada ka don ka aiñ kaba khlaiñ ruh hynrei namar ba ki riew khwan spah pyrkhat ïalade, kim kheiñ snep bad ki tur katba ïap katba im. Ka thma pyrshah ïa u drok kam ïapher na ka thma ban ïaleh pyr-shah ïa ka jingkynrei bad ka jing-shyrkhei jong ka plastik ha kylleng ka pyrthei. Kumba long lem kiwei ki jylla, ki ri ka pyrthei, ka ri India bad ka jylla Meghalaya ka ïakyn-duh kajuh ka jingeh na ka jing-shyrkhei jong u drok bad kumjuh ka plastic. Ka thma pyrshah ïa ka plastic ka la jur bha hynrei katba dang ïaleh ban pynduh ïa ka, ka la nang jur pynban ka jingpyndonkam plastic. Mynta ha ka met u briew la shyrkhei u drok, katba ha ki wah ki um ha ka mariang, la satah ki plastic haduh ba ka la buh shibun ka jingma ïa ka jingim jong u briew bad kumjuh ïa ka mariang. U briew u dei ban sngewthuh ba khlem ka mariang kaba khuid, um lah ban im bad lada pynjot ïa ka mariang, ka long kumjuh kumba pynjot ïa u briew.
La ïohi ba ki briew ki la ïaleh pyr-shah ban pynduh ïa u drok, ïa ka plastic hynrei kam shym la seisoh haduh mynta. Kumta, ka la don-kam ïa ka bor sorkar ba kan pyn-wan dur da ka bor jong ka aiñ, ban pynïadon bynta lang ïa ki bor shnong, ki seng samla jong ki shnong, ban ïaleh pyrshah ïa u drok bad kumjuh ïa ka plastic. Ka la donkam eh ïa ka sorkar ba kan thaw thymmai noh ïa ka tnad sorkar ne ka Department kum ka Civil Society Department ban peit kyrpang tang na bynta ban phikir ïa ki kam imlang sahlang ha man ki shnong, khang ban lah ban tehla-kam ïa ki jingsniew ba har rukom.
