U Myntri Rangbah ka jylla u Conrad K Sangma na ka NPP, u la sam doh kyndang sha baroh ki 11 ngut ki myntri sorkar kynthup ki paralok na kiwei ki parti kiba ïadon lang ha kane ka sorkar. Kaba duh nong bha ka dei ka PDF kaba khlem ïoh kam myntri bad ki MLA shimet hynrei ka HSPDP lah ban ong ba ka don bok ban ïoh myntri namar ba sted ban leit nyngkong ban ïathaw sorkar. Na bynta ka HSPDP ka la biang ka jingkheiñ, bad kam don than kano kano kaban ong ba ka la leh shiliang ne bym kheiñ snep. Hynrei kaba kham duh nong na kane ka jingbate kam jong u Myntri Rangbah ka dei ïa ka BJP bad khamtam ïa ka UDP.
Ki tnad kiba ka UDP ka ïoh bad ka BJP ki dei ki bym lerkam than namar baroh ki tnad ba kongsan la bat hi ka NPP kaba ïalam ïa ka sorkar. Ka tnad pla tyngka, pynroi sor, ka PWD, ka Mining, ka Industries, ka Transports, ka Education, ka tnat ka koit ka khiah bad ka tnad kam pohïing kiba dei ki tnad sorkar kiba kham kongsan la bat lut ka NPP. Katba ka UDP ka ïoh tang ka kam jngohkai, social welfare, arts bad culture, ka Excise, Revenue and Disaster Management, legal metrology. Kine ki tnad ki dei kiba kham rit bad kiba rit kiba ria ha ka jingtreikam ka sorkar jylla. Katba ka BJP ka ïoh ïa ka tnad ri jingri, SAD, Printing and Stationery. Lada shu peit ïa ka jingbhah ïa ki tnad sorkar, ka UDP kam don jingmut ban kmen bad kumjuh ka BJP.
Ka la don ka jingïakren ba ka jingshah leh sat ka UDP ban ïoh tang ki tnat kiba rit kiba ria, ka dei na ka jingleh jongka hi, kaba la leit ban pyndem ha ka NPP hadien ba kam lah ban thaw sorkar ïalade na ka jingphet noh ki 2 ngut ki MLA ka HSPDP sha ka sem ka NPP. Ka jingleit pyndem ka UDP ka la long lehse ka daw, ba ka NPP kan ym kheiñ snep shuh bad ka pynsting ïa ka jingmut jingpyrkhat jongka, ba ka UDP ka dei ka parti ka bym lah ban shaniah khamtam hadien ba kila ïather ha ka rynsan ïalap elekshon. Ka jingleit thaw sorkar lang ka UDP bad ka NPP, kan ktah shibun ïa kane ka seng riewlum namar ba ki paidbah ha ri Khasi-Jaiñtia kim kwah shuh ba kan thaw sorkar lang bad ka NPP kaba don lang ruh ka BJP hynrei ka UDP ka la leit tur ruma tang ban ïoh jingmyntoi khlem shwa ba ka jingsngew jong u paidbah kan jem bad ka la long kumba leit tynruh ding tyllaw ha ka ding ïa ka jingsngew jong ki paidbah.
Hynrei ka la don sa kawei pat ka bynta ha kaba ka UDP ka lah ban leh eiei lada ka kwah ha ka por kaba biang, bad kata ka long ban pynkhih ne ban pynkhyllem ïa ka sorkar. Kane ka jinglong jingman na ka rukom ai bhah ïa ki tnad ha kane ka sorkar, kan pynsuk ïa ka UDP ban wad daw ha kine ki sngi ban wan lada don kano kano ka jingïakhih kaba lah ban ïalam sha ka jingkhyllem syndon ka sorkar. Khlem pep, lada ka UDP ka don ka mon, ka lah ban pynkhyllem ïa kane ka sorkar ka NPP da kaba thaw sorkar lang bad kiwei pat ki parti hadien katto katne por. Tangba kawei kaba kham eh ïa ka UDP ka long ba ka dur ka dar jongka, ka la ktah na ka jingleit ban ïathaw sorkar lang bad ka NPP ha kane ka kynti hadien ba ka la dep ïashong lang la san snem bad ïakynther ha ka elekshon. Ka MDC elekshon kan pyni haduh katno ki paidbah kin ai ïa ka jubab ïa ka UDP bad kiwei ki seng riewlum.
