Ka Kashari Meghalaya High Court kam shaniah shuh ha ki pulit ka Meghalaya ban talasi ïa ki trok kit dewïong beaiñ bad ka jingtih dewïong beaiñ bad kane ka la paw hadien ba ka la pynmih ïa ka hukum ba dei ban aiti ban peit ki bor pulit ka sorkar pdeng ki Central Industrial Security Force (CISF) ha kane ka jylla Meghalaya. Ka High Court kala pynmih ïa ka hukum ba 10 kompeni ki pulit ka CISF ki dei ban shimti ban talasi, ban peitngor ïa ki trok kit dewïong beaiñ bad kumjuh ïa ka jingtih dewïong beaiñ ha kane ka jylla.
Kane ka jingbthah ka Kashari ban ïaid lait syndon ïa ki pulit ka jylla ban ym dei shuh ban aikam ïa ki ban talasi ïa ki kali kit dewïong beaiñ, ka jingtih dewïong ka la dei ka kam kaba ktah matïong ngaiñ ïa ka tnad pulit ka jylla bad kawei ka la ktah ruh ia ka sorkar jylla. Ka sorkar jylla ka la dei ban sngew jah burom khait halor kane ka bynta haduh ba ka Kashari kan shim ïa ka sienjam haduh katne ban khot ïa ki bor pulit nabar jylla ban peitngor ïa ki kam jyrsieh dewiong ha kane ka jylla Meghalaya. Ka dei ka jingsneng kaba tyngeh ia ka sorkar jylla ba kan poi ka khep haduh katne ban duh ka jingshaniah ha ka kashari. Lada kat ka Kashari ka la pynmih kat kane ka hukum, hato ki briew kiba don ha ka bor ki kyndit ki sngew triem ne em. Ha ka jingshisha, kane ka hukum ka Kashari ka dei ban long ka jingpynshitom kaba pynjah burom haduh katta katta ïa ka tnad pulit bad ka sorkar jylla hi baroh kawei. Ka paw ba ka jylla jong ngi ka la budnam shabar bad ka la ïoh kyrteng kum ka jylla kaba synshar ki runar ne goonda, ki bym salia kim bym kheiñsnep shuh ban lute naphang ïa ka spah ka jylla.
Ha kine ki snem ba la leit, ki paidbah kila sakhi ïa ka jingtih bad shalan beaiñ ïa u dewïong hynrei na ka liang ki briew kiba don ha ka bor, kim salia ban len pyllein pylleiñ bad kop hana wanrah da ki sakhi ba ka don kum kata ka jingshalan beaiñ ïa u dewïong. Hynrei mynta hadien ba la ai ka High Court jraiñ da ka hukum, kine ki briew kiba don ha kane ka sorkar ba mynta ruh, ki nud ne em ban dang kop.
Ka jylla Meghalaya ka duk namar ba ki briew kiba don ha ka bor synshar ki dei ki khwan myntoi ha kaba u paidbah u la jied ïa ki ym namar ba ki tbit shisha ban synshar hynrei namar ba ki pynbiej pynngop da ka bor pisa bad kiwei ki jingpyn-thame ha ka por elekshon. Haduh mynta, ka jylla Megha-laya kam tip lynti shano ban ïaid namar ba ka don hapdeng ka jingkutlad namar ba kiba don haka bor kim don ka jingstad ban ïalam. Haba ka jylla ka don hapdeng ka jingïaid lamwir, kan long thik kumba shong ïa ka lieng khlem u boitha katba shaba rah ka lyer. La dei ka por ïa ki paidbah ban kyndit noh ia ka rukom ban jied ïa ki nongmih-khmat ne ki nongïalam ia ka jylla ha ka lynti kaba dei, lym kumta, kan nang jot nang troiñ katba nang ïaid lada ailad ïa kijuh ki briew kiba la mlien tang ban kamai spah ïalade.
