NONGSTOIÑ:
Ka Siejlieh Sport, Social & Cultural Youth Orga-nisation myn ha ka sngi saitjain jong ka taiew ka la ïoh ban rakhe lehkmen ïa ka jubili rupa jong ka jingkynjoh sha u Mawmer ba 25 snem jong ka kynhun, ha kaba u Ma Vincent H. Pala MP ka Shillong Seat u la wan ban pynher ïa ka lama jong ka jingsdang ïa katei ka sngi kyrpang kum u kongsan ryngkat ka jingiasynranlang u Bah Gabriel Wahlang MDC ka Nongstoiñ, Bah Bormanding Nonglang President ka West Khasi Hills District Congress Committee, u Samla Deborland Kharsyntiew Secretary ka shnong Siejlieh, u samla Bendrowell Hashah Secretary ka Siejlieh Sport, Social & Cultural Youth Organisation bad kiwei kiwei ki riew rangbah jong ka thaiñ kaba kynthup ruh ïa ki nongtrei jong ka seng Congress.
Ha katei ka sngi u kongsan u la ïoh ban pynher ïa ka lama jong ka kynhun bad ha kajuh ka por u la kynjat ruh ïa ka bol kaba long kum ka dak jong ka jingplie ïa katei ka sngi, namar la ong ba ka shnong kan rakhe ïa katei ka Jubili rupa haduh shi snem lynter lyngba ki jingialehkai bapher bapher bad la ïoh ban sdang ruh mynta ka sngi da ka jingïalehkai Kynjatbol bad ka Mawpoiñ na ka bynta jong ki kynthei.
U ma Vincent haba ai jingkren ha katei ka sngi u la pynbna ruh ba un ai haduh 5 lakh tyngka ïa ka kynhun ba kan pyndonkam na ka bynta katei ka madan shnong bad u la bthah ruh ïa u President ka kynhun ba un pynbiang noh khamkloi ïa ki kot ki sla khnang ba un ïoh ban pyllait noh ia ka cheque.
Kum shibynta ban pynshit pynshngaiñ shuh shuh ïa katei ka jingïalang la ïoh ruh ïa ki jingshad bad ki jingrwai na ki khun shnong, bad ïa katei ka sngi lehkmen la pynlong ha madan shnong Siejlieh Nongstoiñ West Khasi Hills District bad la wan ban ïa sakhilang ïa katei ka sngi lehkmen da ki khynnah skul, ki paid nongshong shnong bad la pynïaid ïa katei ka jingïalang da u Bah G.W.Nonglang President ka Siejlieh Sport Social & Cultural Youth Organisation.
