KOHIMA :
Ka sorkar jong ka jylla Nagaland kan ai sngewbha da ka song pisa na ka bynta kito kiba lah ban wanrah takma sha ka jylla ha ka jingleit ïashim bynta ha ka ‘Northeast Olympics’ kaba ar, la pynpaw bad ong u Myntri Rangbah ka jylla u Neiphiu Rio.
U Myntri Rangbah ka jylla u Rio, uba long ruh u president jong ka Nagaland Olympic Association (NOA), u la pynbna ban ai Rs 50,000, Rs 25,000 bad Rs 10,000 ïa kito kiba wanrah ïa ka takma ksiar, rupa bad rnong.
Ïa kane u la pynpaw ha ka por ba la ai jingkren hakhmat ki nonglehkai sport ha ka jingrakhe kitbok kaba la pynlong ha nongbah Kohima.
Ka Nagaland ka la phah bun tam ki nonglehkai ba kynthup bad don haduh 305 ngut ki dkhot sha ka jinglehkai ka ban long ha nongbah Shillong naduh ka 10 haduh ka 16 tarik u Naiwieng.
“Ka Northeast Olympic ka dei ka rynsan sdang jongphi baroh bad kan ai jinghikai ban plie ka lad ba phin nanglah ban jam shaphrang”. La ong u Myntri Rangbah ka jylla bad pynpaw ruh ba u don ka jingshaniah ha ki bad kwah ba kin lah ban leh bha. U la bteng bad ong ruh ba ka sorkar jylla ka dei kaba la pyrshang ban kyntiew ki kam sport ha ka jylla.
Na ka liang u General Secretary ka NOA u Abu Metha pat u la pyntip ba ka kynhun na Nagaland ka dei kaba bun tam napdeng ki nonglehkai ha katei ka lympung ïalehkai jong ka Norteast Olympic kaba long ha ka jylla Meghalaya.
