SHILLONG
Ka West Jaintia Hills, Ri Bhoi, West Khasi Hills, bad East Jaintia Hills ki la ïoh ban rung sha ka phainal jong ka lympung Chief Minister State Level U-12 Football Tournament 2023 kaba lah sdang naduh ka 12 tarik bad kaba la pynlong ha SAI STC Center kaba don hapoh ka kut jong ka skulbah Nehu, Shillong.
Ha ka jingïakhun kaba nyngkong ha ka thup jong ki synrang, ka West Jaintia Hills ka la pynliem noh ïa ka Eastern West Khasi Hills da 2 la 1, ha ka jingïalehkai kaba bud, ka Ri Bhoi ka la pynliem noh ïa ka East Khasi Hills da 5 la 4 lyngba ka tie breaker.
Katba ha ka liang jong ki kynthei, ka West Khasi Hills ka la pynliem noh ïa ka East Khasi Hills da 2 la 0 bad ka East Jaintia Hills ka la pynliem noh ïa ka South West Khasi Hills da 2 la 1 lyngba ka tie breaker.
Ka jingïalehkai phainal kaba nyngkong mynta ka sngi ka 16 Jylliew ha ka liang jong ki kynthei, ka West Khasi Hills kan ïalehkai pyrshah ïa ka East Jaintia Hills ha ka por 9 baje mynstep bad ha ka liang jong ki shynrang, ka Ri Bhoi kan ïakhun pyrshah ïa ka West Jaintia Hills ha ka por 11 duna shipawa mynstep.
Kine baroh ki jingïalehkai lashai ka sngi kin long hapoh ka madan ïalehkai jong ka SAI STC Center, Shillong.
