MAIRANG:
Ka Ophis jong u Deputy Commissioner, Eastern West Khasi Hills District, Mairang ha ka jingïatreilang bad ka Ophis jong ka District Sports Officer bad ka District Sports Promotion Society kan pynlong ïa ka jingïamareh marathon mynta ka sngi ka 31 tarik Risaw.
Ka jingpynlong ïa kane ka jingïakop mareh kan long kum shi bynta ban rakhe ïa ka National Unity Day Azadi Ka Amrit Mahotsav.
Ïa kane ka jingïamareh yn sdang naduh ka por 7:15AM mynstep na ka phyllaw jong ka ophis jong u Deputy Commissioner ka Eastern West Khasi Hills District.
Kane ka jingïamareh marathon kan long na bynta baroh (open category) shynrang bad ki kynthei ki lah ban ïashim bynta.
Kan don ka jingsam ïa ki khusnam ïa ki nongmareh kiba jop ha ka liang jong ki shynrang bad ki kynthei, na ka bytna kiba rah ïa ka kyrdan ba nyngkong kin ioh ïa ka song pisa kaba long 3 hajar tyngka, ba wan ba ar 2 hajar tyngka bad ba wan ba lai 1 hajar tyngka.
Kan don ruh ka jingsam ïa ki consolation prize kaba long 500 tyngka haduh kiba poi ïa ka kyrdan ba 11.
Ki nongïashim bynta kiba kwah ban ïashim bynta ha kane ka jingïamareh marathon Run for Unity ki lah ban register ha kane he kajuh hi ka sngi naduh ka por 6:00AM baje mynstep ha shuwa ban sdang ka jingïamareh marathon .
Ka lynti ïaid na bynta kane ka jingïamareh Run for Unity kan sdamg na D.C Office – Lumsohkhlur-Mot Tirot-Tirot Sing College Weimynsier-Tirot Sing Ecological Park-St.Thomas Playground-Dommawlum Playground, Tiehpdang Road-N.H 44 (E) bad yn pynkut biang ha D.C Office.
