NONGPOH:
Ki 3 ngut ki nongïakhun kti na ka jylla bad kiba la ïoh ban khur Takma, haba ki la mihkhmat na ka ri ha ka World Arm Wrestling Championship 2022 kaba la long dang shen ha Antalya, Turkey, mynta ka sngi ki la shah pdiang sngewbha ha ki paidbah ka Ri Bhoi, kata naduh ka KSU, RBDSA, Umsning Town Dorbar, ïa kaba la pdiang sngewbha ïa ki ha Umsning.
Ha kaba nyngkong, ïa kitei ki 3 ngut kiba la khur Takma Ksiar lem bad ïa kiwei pat ki bym lah ban khur Takma, la leit ban shaw ïa ki naduh kad liengsuiñ ha Guwahati da ki nongïalam ka Meghalaya Arm Wrestling Association, bud sa ka KSU ha Nongpoh, ka RBDSA ha Umsning Nongthymmai, hynrei kaba kham heh bad kaba shongkun eh, ka dei ha ka jingpdiang paidbah ha Umsning.
Lah ruh ban kdew hangne, ba kitei ki 3 ngut kiba la khur Takma ha katei ka World Arm Wrestling Championship 2022, ki kynthup ïa ka Kong Margareth Pathaw na Umsning, kaba la long ka lahduh ha ka pyrthei bad khur Takma Ksiar, kata hadien ba ka la lah ban pynliem noh ïa ka Santos Anna na Brazil ha ka kyrdan Master Class Women 60kg ha ka kti ka diang bad khur Takma rupa ha ka kti ka mon.
Nangta pat ka Kong Angel Mary Khunsyiem Mylliem Umlong, ka la ïoh ban khur Takma rnong ha ka 60 kg Women’s Class bad u Alexander Lyngdoh u la ioh ban khur Takma rnong ha ka 80 kg Mens Senior.
