TURA:
Ka Ri Lum Garo baroh kawei ka long kumba kyndit na ba thiah, hadien ba ka sorkar jylla ka la shim ïa ka sien jam ba ha ka sien kaba nyngkong, ka lympung bah ïalehkai kaba heh tam hangne ha ka jylla, katta ka 5th Meghalaya Games kan sdang naduh lashai ka sngi ka 15 tarik u Kyllalyngkot 2024 ha sorbah Tura.
Kum ka dong bad ka thaiñ jong ka jylla Meghalaya, ki samla na ri lum Garo, kim dei satia kiba da duna lada ïa nujor bad kiwei pat ki khun samla jong ka jylla ha ka liang ka sports, hynrei ïa katta ka sap kaba nylla ka jong ki, ym lah satia ban sei na ka bynta ban pynpaw pyrthei na ki daw kiba bun.
Hynrei ka jingwan ban pynlong ïa ka Meghalaya Games, kaba don baroh 23 tylli ki jait jingïalehkai bad ïashim bynta da kumba 3000 hajar ngut ki khun samla, khlem pep kane kan ktik bad kyrsiew thiah lang ïa baroh ban khreh na ka bynta ban phai lem noh la ki khmat sha ka kam ïalehkai.
Haba ïadei bad ka jingpynlong ïa ka Megalaya Games ha Tura, la ïoh ïa ka lad ban ïashem bad ïa kynduh ïa ki kato katne ki briew ban twad jingmut lem na ki, ba haduh katno ka jingpynlong ïa kane ka lympung kan khreh ban pynkylla ïa ka dur ka dar jong kane ka dong ka thaiñ ha ka jylla.
“Kane kan dei ka sien ba nyngkong ba ka Tura kan lah ban pynlong ïa kum kane ka lympung kaba don baroh ki jingïalehkai ba dei jong ka Olympic, bad kum uwei na ki riew ïalehkai ngam artatien ba ki nongshong shnong ka Tura kin kmen lang bad ban ïasnoh kti ha ka ban pynïaid beit pynïaid ryntih ïa ka, katno tam lei lei haba ka jingwan ban pynlong ïa kum kane ka lympung ka wanrah ruh ïa ka jingroi ha ka liang ka jingtei ïa kiba bun ki madan ne ki jaka ban ïalehkai, kaba nang ai mynsiem ïa ki khun samla.
Wat la katta ruh, ki paidbah Garo ki long pat ki briew kiba ieit bad ba sngewtynnad bha ban peitkai ïa kino kino ki jingïalehkai, tang kum ka nuksa, dang ha u bnai ba la dep da ki hajar ngut ki paidbah ki la ker tawiar ïa ka madan phutbol baroh kawei tang ban ïoh ban sakhi lem ïa ka jingïalehkai phutbol hapdeng ki ar kynhun ha ka shnong Phulbari, nalor kata ka ju don ruh kawei ka lympung ïalehkai hapdeng ki kur ba juh tip ïa ka kum ka Mahari Tournament, kaba hangne ruh ka jingïamih shakhmat ban ïashim bynta da ki kur ka long kaba jur bha.
“Mynta ka kynti, kane ka ban sah nam pateng la pateng, namar kan dei ka sien ba nyngkong ba ka President ka ri kan wan ba kan ïuh kjat bad ban plie ruh ïa ka pyrda jong kane ka lympung, kane khlem pep kan ai mynsiem ïa ki samla ba ïalehkai, halor kane, nga sngew ban ai khublei ïa ka sorkar jylla ba kan lah ban wanrah ïa kane ka lympung namar kan pynlong ïa ka Tura kum ka sorbah kan don mynta ïa ki jaka ne madan ba lah ban pynïalehkai wat ïa ki lympung bah jong ka ri” la pynpaw u Nag.
Kyntang ïawai kane ka sien jam ba la shim da ka sorkar jylla ban pynlong ïa ka Meghalaya Gams hangne ha Tura yn nym lah da lei lei ban beiñ ïa ka, namar kane ka jia long na ka jinkren jong u Myntri Rangbah u Conrad K Sangma u la kular ïa ki khun samla ba nangne shakhmat ïa ka sharak bad ïa ka mynsiem jong ka jingieit ïa ki jingïalehkai ne sport kan ïai tbeh bad rhem ha baroh ki bynta jong ka jylla bad ban long ruh man la ka snem.
